Reportajen: Ana Graciana Soares
DILI (lifaupress): Diretor Gabinete relasaun externa no komunikasaun Autoridade Protesaun Sivil (APC), Cesario da Silva Marques informa, durante semana ida ba kotuk, Autoridade Protesaun Sivil liu husi CNOPC rejista kazu dezastre hamutuk 59 ho tipu diferente iha munisipiu 11.
“Hahu loron 1 – 7 Jullu 2024, durante semana ida nia laran, iha teritoriu Timor Leste akontese dezastre 59,” Cesario da Silva inform ba jornalista sira, liuhusi konferensia imprensa, Segunda-feira (08/07/2024) iha Edifisiu Autoridade Protesaun Sivil Caicoli, Dili.
Husi dezastre sira ne’e, CNOPC tutela ba iha Autoridade Protesaun Sivil, Sekretariu Estadu protesaun sivil no Ministeiru Interior rejista mate ida, evakua ema 20. Alemde ne’e, rejista mos insediu, anin boot, rai halai, bee sa’e, uma kain 21 aat tiha no asidente marítima. Total ema afetadu ba dezastre iha semana ida nia laran hamutuk 158.
Dezastre sira kompostu husi Ro Lojistiku Indonezia ne’ebe atu desloka ba Papua, hasoru anin – udan boot no mout iha area tasi Atauro, munispiu Dili, ho ema 16. Entre 16, ema ida mate no polisia maritima liuhusi asaun lalais salva tia ema na’in 15. Atualmente, iha hela prosesu entrega ba imigrasaun Indonesia.
Entretantu, anin no udan bo’ot akontese iha munisipiu Bobonaro ne’ebe anin sobu uma 3, anin sobu uma 4 (Baucau), anin sobu uma ida, rai halai (Covalima), rai halai iha fatin 9 (Ermera), insediu urbanu 1 (Dili), anin sobu uma 1, bee sae ka inundasaun afeita ba uma 11 (Lautem), anin sobu uma 4, rai halai (Manatuto) no anin sobu uma 4, rai halai iha munispiu Manufahi.
Nia konfirma, Komandu Protesaun Autoridade munisipiu liu husi parseiru relevante sira, fo ajuda emerjensia ba familia afeitadu sira, tuir kategoria atribuisaun bazeia ba Dekretu Lei 7/2021, 9 de Marco ne’ebé fo kompetensia tuir artigu 4 no 10.
” Sira rekolla no kategoriza emerjensia, ami apoia tiha ona. No tuir artigu 10 kona – ba klasifika abilitasaun, sei klasifika hela tuir kategoria estraga total, kaman no naton. Ita hein nia prosesu, no kada semanal sei fo sai ba publiku, liuhusi media sira,”nia reafirma. (*)
