Reportajen : Florentina Bianco da Cruz
Dili-Lfaupress : Eskritoriu Provedoria de Direitus Humanos e Justisa (PDHJ) provizório muda ona ba Hotel Excelsior Resort iha Pantai Kelapa, Fatuhada, Dili, Segunda-feira (26/1/2026).
Provedor de Direitos Humanos e Justisa (PDHJ), Virgílio da Silva Guterres hato’o asuntu ne’e liuhusi komferesia imprensa iha Hotel Excelsior Resort, Dili, segunda (26/01/2025). “ Hakarak atu fó hatene ba públiku katak, eskritoriu provizóriu PDHJ hahú ohin ba oin, muda ona ba iha Hotel Excelsior Resort iha Pante Kelapa, Fatuhada, Dili,” Provedor Virgilio da Silva Gueterres informa liuhusi jornalista sira.
Nia esplika, edifisiu PDHJ iha Kaikoli, Dili, hamamuk tanba prosesu preparasaun ba konstrusaun foun. “ Prosesu tenderlizasaun la’o ona no dala-ruma iha fulan oin kompania sira hahú halo konstrusaun. Hakarak agradese no apresia Governu, tanba deside halo konstrusaun edifisiu foun ba edifisiu PDHJ,” nia esplika.
Iha eskritoriu foun ne’e, tuir Provedor Direitu Umanus, provizório Adjuntu ho Adjunta PDHJ no Diresaun balun maka iha edifisiu hotel ne’e. Iha prinsipál resesaun ne’e, iha Diresaun Asistensia ba Públiku (DAP), hodi fasilita sidadaun sira ne’ebé hatama keixa.
“ Husu ba maluk sira, sidadaun ne’ebé hakarak hato’o keixa karik, mai iha fatin ida – ne’e, Hotel Excelsior Resorport, tama husi odomatan principal, mai iha liman loos iha kedas Diresaun Asistensia Públiku,” Virgilio Guetrees informa.
Kona-ba orsamentu ba konstrusaun edifisiu foun ne’e, Virgilio informa, orsamente maihusi Orsamentu Jeral Estadu (OJE) ho montante miliaun USD $ 8 resin. “ Ba ita, importante mak kualidade konstrusaun. Kona-ba durasaun tinan ida ka rua, importante iha edifisiu forte iha área Caicoli,” nia dehan tan.
Nia mós seidauk informa kona-ba kompaña konstrutor, tanba atualmente sei iha hela prosesu tenderizasaun. “ Bainhira prosesu konkursu ka tender hotu ona, sei avizu ba publiku kona-ba kompania se mak manán, orsamentu hira, durasaun fulan hira ou tinan hira, sei tau mos kuadru iha Kaikoli hodi ema hotu asesu informasaun ne’e,” nia dehan. (*)
