Reportajen : Celcia Magn
VENILALE (lifaupress) : Negosiante sira iha Merkadu Venilale, husu ba autoridade Postu Administrativu Venilale, Baucau, atu hadia eletrisidade ne’ebe lakan ona durante tinan 2 ona, tanba fo risku boot ba atividade negosiu no seguransa iha tempu kalan.
Merkadu munisipal Venilale nuudar segundu merkadu iha munisipiu Baucau, atualmente la iha pesoal seguransa hodi hein merkadu iha tempu kalan. Durante fulan rua ikus, ema diskunhesidu na’ok negsosiante sira-nia sasan barak.
“ Eletrisidade paradu durante tinan rua ona. Agora negosiante ida idak uza eletrisidade privadu hola pulsa. Maibe ba iha merkadu liur nakukun. Nune ema deskonesidu aproveita hodi nauk sasan tuir sira – nia hakarak.” Alberto, nuudar negosiante hateten.
Alberto, Negociante
Negosiante sira hato’o ona kazu ne’e ba autoridade Postu administrativu Venilale, maibe seidauk hadia eletrisidade. Nune’e mos seguransa, seidauk aloka iha merkadu munisipal Venilale.
Ana Ofelia, nudar negosiante husu ba autoridade rezolve lalais asuntu seguransa iha merkadu munisipal Venilale. Tanba nia sasan hanesan roupa fabrika lakon iha merkadu kuaze ho osan montante rihun ida nia folin. Maibe to’o agora seidauk diteta loloos naokten nee tanba la iha pesoal seguransa.
Ana Ofelia, negotiate Merkadu Municipal Venilale
Entretantu Xefe Postu Administrativu Venilale, Jose Freitas Boavida esplika, desizaun atu hadia dependen husi servisu eletrisidade – EDTL. “ Autoridade Postu la iha poder atu hadia eletrisidade. Ami kordena deit ho EDTL mak bele hadia,” Xefe Postu Administrativu Venilale, Jose Freitas Boavida dehan.
Iha tempu badak, autoridade sei rezolve Seguransa, liuhusi rekruta ema na’in 10. Husi na’in 10 ne’e, na’in 5 ba limpeza areador sira iha merkadu laran no na’in 5 seluk halo seguransa iha merkadu munisipal Venilale. (*)
