VENILALE (lifaupress) : Gabinete Prezidente Republika, liuhusi Asesor Prinsipal Prezidente Republika ba Asunto Inkluzaun Sosial, Gaspar Afonso husu ba ema ho difisiensia sira labele tur iha dalan ninin, hodi esmola. Tanba asaun ne’e hamonu dignidade difisiensia sira.
Asesor Prinsipal Prezidente Republika ba Asunto Inkluzaun Sosial, Gaspar Afonso hato’o ida nee, Tersa Feira (28/05/2024) tuku 10 dader OTL, hafoin fila husi vizita ba labarik ho definsiensia Robi Camara de Oliveira iha nia hela fatin area Ariana, Aldeia Uatu-asa, suku Uatu-Haco , Postu Administrativu Venilale, Baucau.
Durante nia viajen atu fila ba Dili, Asesor Gaspar Afonso konsege vizitaa ema ho defisiensia ida tur iha dalan ninin iha aldeia Lia oli, suku Bahamori, Postu Administrativu Venilale, Baucau.
Tuir informasaun ne’ebe online notisia www.lifaupress.com rekolla, dalaruma ema ho defisiensia ne’e tur iha Estrada ninin husi dader to’o loraik mak fila ba uma.
Haree realidade ne’e, Asesor Prinsipal Prezidente Republika ba Asunto Inkluzaun Sosial, Gaspar Afonso husu atu labele tur iha dalan ninin tanba perigu ba moris. “Simu ona Subsidiu difisiensia nian ka sedauk?,” Gaspar husu.
Justino, Difisiensia ain no liman hatan ” Ha’u simu ona subsidiu kada fulan tolu no hetan ona fasilidade, maibe la to’o ba hau nia nesesidade loron loron.
” Rona deklarasaun ne’e, Asesor Gaspar Afonso hateten, “ Iha planu atu hasae osan ba ema ho difisiensia sira, hodi simu kada fulan. Nune labele fo impaktu ba moris. Ba futuru labele tur tan iha dalan ninin. ”
