Reportange: Osterlia Muni/Lucinta
MAONESI-(Lifaupress) : Autoridade Rejiaun Administrativa Espesila Oe-cusse Ambeno (RAEOA) reprezenta husi Koordenador ZEDOOA, Erkulanu Da Sousa, lansa Projetu Konstrusaun Eskola Foun Ensinu Baziku Filial (EBF) Maonesi, Tersa-feira (06/01/2026) iha Aldeia Bonemese, suku Naimeco, Sub Rejiaun Pante Makasar.
Koordenador ZEDOOA, Erkulanu Da Sousa hateten, Diresaun Regional Edukasaun no Solidadaridade Sosial hamutuk Autoridade lokal no komunidade sira, hamutuk koletivamente halo esforsu oioin atu nunee bele realiza obra ida nee.
“ Ne’e la’os ema ida nia servisu, maibé ita hotu servisu hamutuk hodi fó hanoin ba malu mak ohin – loron ita bele rai fatuk ida primeiru, ita hari’i eskola ne’e ho sala tolu tan ba ita – nia oan sira, atu habadak dalan para sir abele eskola lorloron,” Erkulanu dehan.
Nia mos fó hanoin, maske projetu ne’e tama kategoria emerjensia, maibe labele trata obra ne’e ho emerjensia. Tanba orasamentu bele tama kategoria emerjensia, maibe nia kualidade tenki tama tuir nia kualidade di’ak, la’os kualidade emerjensia.
Diretór Regional Edukasaun no Solidadariedade Sosial, Vincêncio Cono hateten, konstrusaun eskola foun ne’e importante tebes, hodi fasilita labarik sira iha asesu edukasaun iha nivel Eskola Pre-Sekundaria
“Foin lalais Autoridade RAEOA fo-sai Dileverasaun ida, atu harii klase paralelo EBF Maonesi hodi prevene estudante abonda eskola no kaben sedu no prevene estudante sira la’o kilometro lima resin kada loron, husi Oel-ulan la’o to’o eskola Meko Sikaloti, hamutuk kilometro 25,” Diretor nee dehan.
Diretór Edukasaun no Solidariedae ne’e husu ba komunidade sira, atu bele servisu hamutuk ho kompania to’o finaliza konstrusaun tuir tempu ne’ebe determinadu hodi bele inaugural lalais.
Kompania ne’ebe hala’o konstrusaun nee’e, liuhusi ajudikasaun direta, tanba tama kategoria projetu emerejensia.
Nia mos informa, iha projeito tolu, mak sei realiza hela. Alemde EBF Maonesi, ida iha Naimeko, ida tan Posto Administrativu Pasabe no Sub Rejiaun Nitibe ninian maka EBF Kusi ne’ebé desde ukun aan la iha konstrusaun foun.
Iha sorin seluk, Xefi Suku Naimeko, Marcos Liu hateten, maske hasoru difikuldade durante tinan hirak ne’e, maibe agradese, kontente no orgullu, tanba suku Naimeko iha oportunidade hetan apoiu husi Autoridade, harii eskola filial Maonesi.
“Hau husu ba inan – aman sira, iha parte Boen mes ho Autoridade aldeia bairo, ita tenki kolabora entre Koordenador eskola ho nia elementos sira, atu obra ida ne’e bele la’o diak. Nune’e, to’o fim ita – nia oan sira bele eskola ho dignu, ” nia dehan. Tinan ida nee, aldeia Bone mese no aldeia noke sei hetan Eskola EBF.
Autoridade Suku ne’e rekuñese, durante ne’e labarik barak la’o bá eskola dook. Dalaruma, labarik sira hanoin barak atu ba eskola tanba eskola dook tebes. ” Ami mós orgulllu tebes ba tinan ida nee, loke eskola SMP iha aldeia Noke, Oel- ulan,” nia hatutan tan. (*)
