Reportajen: Celcia Magno
VENILALE (lifaupress) : Eis Xefe Suku Fatulia, Constancio Jose Do Rego hakotu iis iha nia rezidensia Aldeia Uatuliana, suku Fatulia, Postu Administrativu Venilale, Munisipiu Baucau, Sexta Feira (10/05/2024) tuku 2:15 madrugada OTL, tanba sofre moras komplikadu.
Matebian Constancio Jose do Rego ne’ebe uikun suku ne’e durante tinan 17 hahu tinan 2000 – 2017, husik hela nia kaben, Elezita Menezes Belo no oan Mane Mesak Adilson Constancio Jose Do Rego ho bei oan mane na’in 3.
Tuir nformasaun, saudozu sofre moras komplikadu estruk iha loron 11 Marsu 2024). no familia lori kedas ba halo tratamentu iha Ospital Regional Eduardo Ximenes HoRex Baucau. Kuaze semana rua kedas, matebian halo tratamentu iha Ospital ne’e.
Hafoin observa matebian nia kondisaun saude grave tebes, mediku sira desidi halo transferensia ba Ospital Nasional Guido Valadares Dili,.
Maske nune’e, matebian nia kondisaun saude la iha mudansa signifikante. Mediku sira, husu familia atu reza, tanba Maromak mak bele deside nia moris. Ikus mai, saudozu Constancio fila ba nia rezidensia Fatulia, Venilale iha loron 25 Abril 2024 hodi halo tratamentu terapia iha uma, no kontinua hemu aimoruk ne’ebe mediku sira fo, to’o nia fila ba Aman Maromak Nia Kadunan Santu.
Oan mane mesak, Adilson Constancio Jose Do Rego ba Jornalista online www.lifaupress.com iha nia rezidensia Aldeia Uatuliana, suku Fatulia, Sexta Feira (10/05/204) tuku 04.00 loraik OTL hato’o sentiment tristeza, tanba aman ne’ebe heroi ba rai ne’e no ukun nia Povu sira ho diak, fila hikas ona ba Aman Maromak Nia Kadunan Santo.
” Hanesan oan Mane Mesak, ami simu realidade ne’e tanba Maromak mak determina jornada ba ema hotu nia moris iha mundu ne’e. Ha’u sei afatin iha responsabilidade ba familia uma laran, liuliu ba Ama, ha’u nia fen no oan na’in3, ” Adilson Constancio Jose Do Rego dehan.
Serimonia funebre ba matebian Constancio Jose Do Rego sei hala’o iha loron Domingu (12/05/2024) iha semiteriu Luga Oli, suku Fatulia, Postu Administrativu Venilale, Baucau.
Durante sai Xefi Suku, matebian lidera nia povu ho di’ak, unidu no harmonia. Matebian mos nuudar veteran no hetan fixa 4 A7 husi ukun nain sira.
Iha tinan 2017, saudozu Constancio sai mos nuudar vise kordenador partidu Fretilin iha Suku Fatulia rasik.
Suku Fatulia iha aldeia 4 kompostu husi aldeia Uatuliana, Bahadato, Uaitobonu no Osoaque. Desde tinan 2018 – 2024, suku Fatulia lidera fali husi Xefe Suku, Angelino Pereira.
Biografia
Matebian Constancio Jose Do Rego no nia kaben Elezita Menezes Belo. Foto Doc familia
Saudozu Constancio Jose Do Rego, Moris iha loron 14 Fevereira 1969 husi Uma lisan Kau-Ho’o, suku Fatulia Postu Administrativu Venilale Munisipiu Baucau oan Mane dalima husi maun – alin na’in 8, kompostu feto 5 mane 3 husi aman Jose Do Rego no Inan Juleta Susuhe .
Tinan 1991, saudozu Constancio kaben ho Elezita Menezes Belo no ho grasa Maromak nian, sira hetan oan na’in 3. Oan na’in 2 selu, fila ona ba Aman Maromak Nia Kadunan Santu, hela oan mane mesak mak Adilson Constancio.
Saudozu Constancio hahu eskola primaria iha Orfanatu Sao Domingos Savio Venilale. Hafoin ne’e kontinua ba eskola Pre-Sekundaria iha Eskola Sao Cristovao Venilale. Maibe la remata nia estudu iha Sekundaria no Universidade. (*)
