Reportajen: Candida Nunes Soares devasconselos/Carlota Rodrigues.
LIKISA (Lifaupress ) : Bomberos Munisipiu Likisa, atualmente preparadu atu hasoru dezastre naturais ruma, ne’ebe akontese iha teritoriu ne’e.
Komandanti Bomberos Munisipiu Likisa, Rogerio Alves Pereira hato’o asuntu ne’e ba jornalista online Lifau Press, Segunda – feira (13/1/2025) semana ne’e iha nia edisifiu Likisa.
“Ami – nia preparasaun la’o nafatin no atendimentu konforme dezastre nebe mak mosu,hanesan Anin boot, inundasaun ka insendiu florestais. Ami preparadu, maske ekipa ho kondisaun ladun sufisiente, ami prontu kualker momentu atu hasoru dezastre,” Rogerio Alves Pereira hateten.
Nia temi fasilidade ne’ebe sira iha, ezemplu atu kombate insendiu, atualmente iha kareta no pasta de insendiu florestais. Ekipamentu ba inundasaun, iha fasilidade supadora atu supa bee, lori aisar dasa bee karai henek, tahu iha komunidade nia leet.
Bainhira ahi sunu uma ruma, uza kareta insendiu rua, ne’ebe sempre preparadu oras 24. “ Kualker insendiu ida, ami sai ba direta fatin akontesimentu, bazeia ba informasaun husi komunidade ka rezidenti ida iha aldeia ka bairo ruma, “ nia dehan tan.
Kada dezastre, bainbain ekipa kombate to’o ema na’in neen ou hitu. Bainhira ia airuma taka dalan, ekipa sempre lori ekipamentu motcera, komesa husi steak nomor satu, tiga, empat tiga, para bele kado ka ta aihun ne’ebe monu.
Ekipamentu ne’ebe mak sedauk iha, baibain Bombeiros Likisa komunika ba Bombeiros Dili, hodi hetan apoiu, liuliu bainhira dezastre kareta ka hasai ema ruma habit aan iha kareta laran.
Atu sensibiliza komunidade sira kona-ba dezastre no oinsa prevene, kada tinan sempre halo sosializasaun ba populasaun, liuliu ba suku ne’ebe kada tina-tinan hetan risiku dezastre.
Kada tinan, APC sempre halo sosializasaun iha suku tolu ou ha’at, hodi fo atensaun no prepara populasaun sira, kona-ba oinsa hasoru no prevene potensia dezastre naturais.
“ Bainhira iha dezastre, sira bele hatene ona, halo preparasun iha tempu udan ka tempu bailoron,” nia informa tan. (*)
