Reportagen : Florentina Bianco da Cruz
DILI (Lifaupress ): Autoridade Protesaun Civil (APC), Segunda-feira (30/06/2025) selebra Anivesariu ba Dala III iha edifisiu APC, Kaikoli, Dili, ho tema “Unidade iha asaun : hamutuk hodi proteze ema hotu la ho deskriminasaun.”
Sekretariu Estadu Protesaun Civil, Domingos Mariano Reis hatete, ezistensia APC durante tinan 3 ne’e atu servi no proteje sidadaun hotu ne’ebé ameasadu husi dezastre.
” Autoridade Civil bazeia ba politika IX Governu Konstitusional, prontu halo protesaun 24 horas no sempre prontu responde dezastre no vitima dezastre sira iha Timor-Leste,” nia dehan tan
Kona-ba dezenvolvimentu institusionál, nia esplika, prevensaun sai programa prioridade atu garantia poupansa orsamentu. Nune’e, edukasaun sidadania importante tebes kona-ba risku dezastre, bazeia ba mapamentu riskus dezastre iha Timor-Leste.
Maibé nia hatutan, presiza rekursu ne’ebé iha kapasidade di’ak, liuliu tenke hatene sinais dezastre, oinsá rekopera no oinsá kuidadu.
“ Minimu jestor sira iha kapasidade selente ho rekursu humanu, rekursu finanseiru no rekursu kapasidade, hodi prepara responta ba emerjensia, koopera ho parseiru nasionál, rejionál no internasionál,” nia esplika, no dehan tan, atu moderniza kapasitasaun rekursu humanu no ekipamentu Protesaun Sivil, sempre halo etapa por etapa.
Tuir Sekretariu Estadu Protesaun Civil, Domingos Mariano Reis, rekursu humanu no fasilidade bele barak, maibé la iha jestor di’ak, programa labele garante mos jentaun orsamentu jeral Estadu.
Iha sorin seluk, Prezidente APC, Jesuíno dos Reis Matos Carvalho hatutan, anivesario iha tinan ida ne’e ho tema “ Hamutuk iha asaun hodi proteze ema ho la ho deskriminasaun,” ne’e, atu hatudu APC sempre prontu iha situasaun no kondisaun saida de’it, atu satan se de’it mak sai vitima asidente ruma. (*)
