Reportajen : Florentina Bianco da Cruz
DILI— (Lifaupress ), Autoridade Protesaun Civil (APC), rejista labarik na’in 3 mout iha tas Likisa. Entre na’in tolu ne’e, na’in konsege hetan no na’in rua seidauk hetan alias lakon.
Xefe Komunikasaun APC, Genovene Fernandes Almeida hatete, bainhira mosu informasaun kona-ba labarik na’in 3 mout iha tasi, familia hamutuk ho autoridade no komunidade sira buka kedas iha fatin akontesoimentu.
Hafoin esforsu ne’e, ikus mai tuku 18: 20 hetan tia labarik ho naran Diago Dos Santos, idade 13. Enkuanto vitima na’in 2 seluk, Tiago Da Silva idade (10) no Delcino Freitas idade 14 seidauk hetan.
“ Familia no komunidade sira kontinua esforsu buka labarik sira – nia mate isin ho forma oioin,” . Porta voz Genovene Fernandes Almeida esplika ba jornalista sira durante konferensia imorensa, Segunda-feira (14/7/2025) iha edifisiu APC, Kaikoli, Dili.
Entretantu kona-ba dezastre ne’ebe akontese iha teritoriu laran desde 7 – 14 Jullu 2025, APC rejista kazu dezastre komposu husi uma 27, Mate (1), lakon (2), Anin sobu (20), rai halai (1) ahi han uma (6), prienxe kriteria (20), apoiu emerjensia (7), ema afetadus (141), ema evakuadu na’in 5.
Munisipiu sira ne’ebe afetadu kompostu husi Baucau akontese Anin sobu 15) no rai halali 1, munisípiu Bobonaro (Ahi sunu uma 1), Ermera (Ahi sunu uma 2), Lautem ( Rai-halai 1, Ahi sunu uma 1. Liquissa (Mate 1, lakon 2), RAEOA (Anin sobu 4, ahi sunu uma 1) no munisípiu Viqueque Anin sobu uma 1.
Comando APC Munisipiu ho parseirus relevante fornese asistensia emerjensia ba familia afetadu sira Ai-han no la’os Ai-han (food item & Non-food Item).
Atualmente, Komando Operasional Autoridade Protesaun Sivil (APC) Munisipiu sira kontinua halo levantamentu detaillu kona-ba sasan ne’ebe aat no lakon.
Kona-ba matéria konstrusaun, ekipa munisípiu sei halo levantamentu dadus no verifikasaun, hare ba kriteria no nivel estragus sira. (*)
