Reportajen : Sichya
DÍLI (Lifau Press): Autoridade protesaun sivil (APC) informa, hahu loron 1 – 8 Abril 0224 rejista xefi família 238 sai vitima ba dezastre naturais hanesan anin boot, ahi sunu uma, anin sobu uma, rai halai no inundasaun.
Porta voz APC, João de Sousa Filipe ba Jornalista sira iha salaun Konferensia APC Kaikoli, Dili, Segunda-fiera (8/04) informa, iha municipio Aileu akontese anin sobu uma rua, Baucau ahi han uma ida, no anin sobu uma rua.
Iha munisipiu Bobonaro, akontese rai halai no anin sobu uma haat, municipio Ermera iha anin sobu uma sia, beé sa’e uma ida, rai halai estraga uma tolu no anin sunu uma ida.
Entretantu iha munisipiu Manatuto, anin sobu uma ida, Bee tama uma 208. Iha , Manufahi akontese bee tama uma 14, no RAEOA anin sobu uma ida. Husi munisipiu Viqueque, anin sobu uma ida.
“ Autoridades protesaun sivil servisu hamutuk ho diresaun sira, halo kedas verifikasaun no foti dadus dezastre sira no fo apoiu emerjência ba vítima sira. Ami halo alerta ne’e liu husi servisu hamutuk ho metodolojia, “ Porta voz APC, João de Sousa Filipe hateten.
Atualmente, anin senti di’ak no kondisaun laloran normal. Iha deit risku mak possibilidade bee sa’e, mota tun, rai halai, ai tohar, anin sobu no seluk tan.
“Husu ba komunidade sira, karik akontese anin boot ho udan, tenki hases aan ou hadok aan husi mota ninin, foho lolon, ai hun boot sira, linha elektrisidade no rai dokumentu sira iha fatin seguru” nia reafirma. (*)
