Reportajen: Selestinho Mani Falo
DILI (Lifaupress) Relasiona ho kazu impedimentu husi protukolu PA RAEOA ba jornalista Tatoli, IP Abilio Elo Nini, Kinta, 06/06/2024, Asosiasaun Jornalista Timor-Lorosa’e (AJTL) halo konferensia imprensa hasoru protukolu tanba kontra lei RDTL no Komunikasaun Social.
“Aktu violente pesoal protokolu PA RAEOA nian hasoru jornalista Ajénsia Notisioza Tatoli, Abilio Elo Nini loron 4 Juñu 2024 nu’udar tetantiva no ameasa ida ba independénsia jornalizmu no liberdade imprensa iha Timor-Leste, hanesan haktuir iha Konstituisaun RDTL, Artigu 40 no 41 no Lei Komunikasaun Sosial Artigu 41 kona-ba atentadu ba liberdade informasaun”, Sekretáriu Geral AJTL, Acaçio Pinto dehan ba Jornalista sira iha sede AJTL, Fatuhada, Dili.
Nia haktuir, Espasu livre no liberdade asesu ba informasaun midia no jornalista nian hatuur kedas ona iha konstituisaun RDTL, Artigu 40 no 41 garantia liberdade imprensa no mos haktu’ur iha Lei Komunikasaun Sosial, Artigu 8 no artigu sira seluk Lei Komunikasaun Sosial.
Nia hatete, rejime sistema politika demokrasia, ambitu liberdade imprensa nian, Midia no jornalista presiza livre atu hala’o sira ninia serbisu iha fatin ne’ebé deit tantu espasu publiku hanesan instituisaun estadu nian.
Kontestu ida-ne’e presizamente tenke iha garantia ida husi aparellu estadu atu midia no jornalista sira livremente halo kobertura ba asuntun no informasaun ne’ebé iha ligasaun ho servisu publiku nian sein impedimentu.
“Violente hasoru jornalista Tatoli ne’e hakanek ona liberdade imprensa no valor demokrasia iha TimorLeste iha tempu ne’ebé Timor-Leste ninia indise Liberdade imprensa tuun husi TOP 10 ba TOP 20. AJTL haree katak aktu violente ida-ne’e sei afeita indise rendimentu liberdade imprensa iha tinan sira tuir mai”.
Nia haktuir, bazeia faktu no situasaun ne’ebé temi leten AJTL hakarak hato’o nia pozisaun hanesan tuir mai: AJTL kontra no kondena aktu violente hasoru jornalista Tatoli ne’ebé komete husi pesoal protokulu RAEOA nian.
Aktu violente ne’e sei hatauk jornalista no midia atu iha kontestu kobertura no publikasaun notisia, liuliu atu garante papé! media kontrolu sosial.
“Atu proteje kualidade demokrasia iha Timor-Leste, kontestu garante boa governasaun no kontabilidade, midia no jornalista hola papél importante atu asegura sidadaun sira nia direitu espresaun nian no sira nia direitu ba informasaun liuhusi kobertura no publikasaun notisia no programa sira midia nian”. nia afirma.
Nia hatete, entidade hotu-hotu iha obrigasaun atu fo espasu livre ba jornalista sira atu asesu ba informasaun sira ne’ebé iha ligasaun ho serbisu publiku nian.
Tanba liberdade imprensa mak sai nu’udar espasu ba sidadaun sira atu hato’o sira nia hanoin no komentariu hodi hakunu prinsipiu check and balance ba servisu hotu-hotu entiadde Estadu nian.
Durante ne’e AJTL halo advokasia hodi promove no hametin liberdade imprensa no liberdade espresaun iha pais demokratiku ida-ne’e.
AJTL kontra no kondena aktu violente hasoru jornalista Tatoli ne’ebé komete husi pesoal protokulu iresponsavel RAEOA nian tanba aktu violente ne’e sei hatauk jornalista no midia atu iha kontestu kobertura no publikasaun notisia, liuliu atu garante papé! media kontrolu sosial.
“Konsiderasaun husi AJTL ba aktu violente ida-ne’e la-hatudu mentalidade demokratiku pesoal entidade sira Estadu nian atu garante boa governasaun no kontabilidade iha pais demokratiku Timor-Leste. Maibé hatudu fali mentalidade vandalizmu hodi impede midia no jornalista atu asesu ba informasaun sira ne’ebé iha ligasaun ho servisu publiku nian”.
Prezidente RAEAO, Rogério Tiago Lobato tenke foti medida no sansaun forte hasoru pesoal protokolu no SECOMS komunika ho instituisaun sira estadu nian atu respeita midia no jornalista nian servisu no kolabora atu sira livremente esesu ba espasu publiku hotu-hotu atu hetan informasaun sein iha impedimentu, nia husu.
“Konsellu Imprensa no asosiasaun jornalista hotu-hotu atu kontinua sosializa Lei Komunikasaun sosial ba entidade sira Estadu nian, liuliu entidade sira RAEOA nian atu sira komprende papél midia no jornalista nian iha pais demokratiku ida-ne’e”.
AJTL mos sidauk hetan esplikasaun husi protukolu RAEOA maibe ita akopaña mídia husi Hatutan, Gardamor Tatoli no midia sira seluk iha RAEOA tenta nafatin PA RAEOA atu hetan nia solusaun, hatan pergunta husi jornalista www.lifaupress.com.
Nia husu, Jornalista no kanal midia hotu-hotu iha railaran atu fo salidariade ba malu hodi kontinua publika kazu ne’e to’o hetan solusaun loloos no justu, kumpri Kédigu Etika Jornaistika, Lei Komunikasaun Sosial no prinsipiu sira jornalizmu nian bainhira hala’o knaar jornalizmu iha ne’ebé deit atu nafatin asegura no garante liberdade imprensa no liberdade espresaun iha Timor-Leste. (*)
