Site Visit Projetu Estrada Rural Iha Ermera
Reportajen : Marcos de Jesus
ERMERA (lifaupress.com) : Ekipa Direção Nasional Aprovisionamentu ho ekipa tekniku Ministeriu Obras Públikas destakadu iha Munisipiu Ermera, organiza site visit ho Kompanhia sira, ne’ebe tuir konkursu ba projetu Rehabilitasaun Estrada.
Projetu Estrada rural ne’ebe ekipa vizita ne’e iha Fatubolu-Manusae, Road Chainage 0+000-3+000, Suku Fatubolu -Manusase, Postu Administrativu Ermera, Municipio Ermera.
Direktur Obras Públika Munisipiu Ermera, Eng. Afonso Fernandes Ximenes hateten, atu garantia kualidade no susesu ba obras sira, presiza koordenasaun no komunikasaun.
Eng. Afonso Fernandes Ximenes mos dezafia empreza ne’ebe sai vensedor ba konkursu refere reabilitasaun Estrada, tenke mantein kualidade obra no tuir dezeñu BoQ.
“ Bainhira konstrusuan la ho kualidade no la tuir dezeñu BoQ, Obras Pública Munisípiu Ermera sei sobu obra ne’e, “ Alfonso dehan.
Entretantu, Administrador Posto Hatulia B, Municipio Ermera, Setório dos Santos Madeira dehan, durante mandatu tinan primeiru, sei foku ba dezenvolvimentu estrada rural ligasaun entre aldeia suku no Posto. “ Husu ba empreza sira atu servisu ho responsabilidade,” nia dehan.
Administrador Setório dos Santos Madeira promete sei servisu hamutuk ho Obras Públikas, atu halo fiskalizasaun ba obra sira, iha Postu Administrativu Hatulia B, Munisipiu Ermera. (*)
