Reportajen : Celcia Magno
VENILALE (lifaupress) : Udan boot ne’ebe akontese loron rua ikus, rezulta bee-boot iha Mota Buihulu suku Uai-Oli Postu Administrativu Venilale, munispiu Baucau. Kondisaun ne’e, risku tebes ba movimentu ema no transporte iha area ne’e.
DADA KARETA: Populasaun sira uza tali dada sai kareta husi mota-laran, bainhira bee -sa’e boot iha Mota Buihulu, Velilae, Baucau. Foto Doc
Tuir observasaun jornalista online www.lifaupress.com, udan – boot ne’ebe akontese loron Sexta (3/5/20240) no Sabadu (4/4/2024) halo bee boot tun husi foho, rezulta bee-boot mos iha mota ne’e. Konsekuensia mak komunidade sira hasoru problema atu hakat ba mota sorin.
Situasaun ne’e, senti rasik husi Prezidente CPD RDTL, Ivo Sequeira ho nia membru sira, bainhira halo movimemtu liuhusi mota Buihulu. Hamutiuk ho komunidade sira lao ain, kaer liman ba malu hakat ba mota sorin, atu kontinua viajen ba Dili, hafoin abertura kuda hare iha suku Uai oli. Venilale, Baucau.
Alende ne’e, pasajeiru, motorista no komunidade sira hasoru difikuldade hakat mota, tanba bee ho velosidade aas. Atu kareta bele hakat mota, komunidade sira hamutuk dada uza tali.
Maske iha kondisaun bee-boot, agradese ba Maromak, tanba pasajeiru, komunidade no kareta sira hakat mota ho seguru.
HAKAT MOTA: Prezidente CPD RDTL, Ivo Sequeira hetan siguransa husi nia membru sira hakat Mota Buihuli, Venilale, Baucau, Sabadu (4/5/2024). Foto doc
Hermengildo Ximenes, nudar sasin iha mota Buihulu ba jornalista www.lifaupress.com via telefone hateten, iha loron Sesta no Sabadu, komunidade, pasajeirus no Motorista sira nakonu iha mota sorin.
“ Ema no kareta iha mota sorin barak loos. Balun obrigadu tenki lao ain hakat mota, dada malu. Nunee mos kareta sira, tenki uza tali mak dada hodi haka tba mota sorin. Motor sira mak ema hulan de’it,” Hermegildo Ximenes dehan.
Komunidade sira propoin ba Governu, atu harii ponte hodi fasilita movimetu ema no transporte ho seguru iha tempu udan. (*)
