Reportajen: Selestinho Mani Falo
OE-CUSSE (Lifaupress) : Universidade Nasional Timor-lorosa’e – UNTL iha tempu badak, sei desloka estudante nain 21 husi Fakuldade Edukasaun Arte no Humanidade ba Rejiaun Administrativa Espesial Oe-cusse Ambeno (RAEONA) hodi partisipa programa estajiu.
Atu realoza planu ne’e, Vise Dekanu Fakuldade Edukasaun Arte no Humanidade, Universidade Nasional Timor-Lorosae (UNTL) Bernardino de Castro, realiza enkontru ho Sekretária Regionál ba Edukasaun no Asuntu Sosiál (SREAS), Inacia Tamele, Segunda-Feira (24/06/2024) iha salaun enkontru SREAS, Santa Rosa, Pante Macassar, Oe-cusse.
Tuir informasaun jornalista www.lifaupress.com asesu husi Media SREAS, enkontru ne’e hala’o ho amigavel no produtivu.
Enkontru ne’e hanesan faze konsultasaun ka pre-asesmentu husi Direjentes FAEH-UNTL ho SREAS no Diretor Eskola sira, antes destaka estudante estagiariu sira mai hala’o estagiu Pedagojia iha Oe-cusse.
ENKONTRU : Sekretária Regionál ba Edukasaun no Asuntu Sosiál (SREAS), Inacia Tamele (klaran) hala’o enkontru ho ho delegasaun UNTL no Diretor Eskola sira. Foto LP/Media officer SREAS
Sekretária Regionál ba Edukasaun no Asuntu Sosiál (SREAS), Inacia Tamele hateten, SREAS, deklara prontu simu estudante sira husi FEAH-UNTL atu hala’o estagiu pedagojia iha RAEOA, espesial iha Eskola Públiku no Eskola Privadu sira, hodi aplika fali saida mak sira aprende ona iha universidade.
“Ha’u hato’o agradesimentu ba UNTL, ne’ebé sempre haruka estudante estagiariu sira mai RAEOA, atu hala’o sira – nia estajiu pedagojia iha eskola sira”, Inacia Tamele dehan.
Autoridade RAEOA ne’e mos rekomenda ba UNTL, atu ba futuru tenke destaka estudante estagiariu ba eskola sira iha Postu Administrartivu Passabe, Nitibe no Oe-sil.
Enkuntu, Vise Decano Fakuldade Edukasaun Arte no Humanidade, Universidade Nasional Timor-Lorosae (UNTL) Bernardino de Castro, mos hato’o apresiasaun no agradesimentu ba kooperasaun entre UNTL ho SREAS.
Estudante sira ne’ebé sei mai hala’o estagiu pedagojia iha RAEOA, hamutuk 21 pessoas. Husi numeru ne’e, na’in 1 destaka ba EBC Meco Sicaloti, EBF. 28 de Agusto ema na’in 3, EBF 30 de Agusto na’in 3, Ensino Pre-ecolar (EPE) Café na’in 1, EPE Francisco Mouzinho ema na’in 2, EPE Noafafo na’in 1, Ensino Secudária Geral Público Palaban ema na’in 7, ESG Baqui ema na’in 2 no na’in 1 destaka ba ETV Palaban.
Entretantu, Docente UNTL, Rafael Savio, hatutan, estajiu ne’e sei halao durante fulan neen. “ Sira mai atu ajuda manorin sira, aprende no aplika teoria saida mak sira hetan ona iha Universidade,” Rafael Savio dehan.
Entretantue, Diretor Eskola sira pronto simu estudante estajiariu sira, no hato’o apresiasaun ba UNTL liu husi Fakuldade Edukasaun Arte no Humanidade, ne’ebé kada tinan koloka estudante estagiariu sira iha Oe-cusse.
Partispa iha enkontru ne’e, Director ESGP-Palaban, , Diretor EBC-Palaban, Diretora ESG-Baqui no Koordenador EBF. 28 de Agusto, Koordenador EBF 30 de Agusto no dirijente eskola sira. (*)
FOTO HAMUTUK : Hafoin enkontru koordenasann iha Oecusse, Sekretária Regionál ba Edukasaun no Asuntu Sosiál (SREAS), Inacia Tamele (Oklu), hasar foto hamutuk ho delegasaun UNTL no Diretor Eskola sira. Foto LP/Media Officer SREAS RAEOA
