NUNUTALI (lifaupress) : Povu Ermera, dala ida tan hamonu mateween no simu tan lutu. Tanba, Lomelino do Rosário Saisinha, hakotu iis iha nia rai Nunutali, Ermera, Kuarta-feira (21/5/2025) tanba sofre moras todan.
Novidades kona-ba atual Prezidenti Asosiasaun Football Munisipiu Ermera ne’e, la’o to’o familia, kolega, Instituisaun no parseiru sira.
Ida por ida, hakbesik ba fatin maktoban iha Nunutali, kuaze kilometru 10 husi Gleno, Kapital Munisipiu Ermera, desde kuarta. Omenajen, rai ai-funan husi familia, kolega, instituisaun, nakonu ho tanis matawen.
Durante kalan tolu Kuarta – feira (21/5/2025) to’o Sabadu (24/5/2025) dader, matebian hamutuk ho familia. Familia em lutada, liuliu nia kaben, Otilia Madeira ho oan na’in 7, ho tristi simu matebian nia belun no Xefi sira hato’o omenajen no orasaun ba klamar atu hetan fatin iha Na’I Maromak Nia sorin Kuana.
Serimonia funeral hala’o de’it iha resintu hela fatin Nunutali, Ermera, akompanha ho tradisaun militar – tiruteu, partisipa husi reprezntante autoridade lokal, membru parlamentu nasional balun, Prezidenti Konsellu Imprensa, Otelio Ote, estrutura Asosiasaun Football Ermera, jornalista sira, familia em lutada, familia husi estrutura uma lulik no komunidade sira.
Iha okaziaun serimonia funeral ne’e, lee mos mensajen husi Prezidenti Republika, Jose Ramos Horta reprezenta estadu, ba matebian no familia em lutada, entrega bendera nasional ba matebian nia oan mane.
Antes serimonia funevre, familia em lutada akompanhia husi familia tomak no belun sira, vizita uluk nia reizndensia iha Gleno tuku 09.30. Hafoin ne’e, kontinua ba serimonia Misa Funeral iha Igreja Gleno.
Hafoin Misa, kontinua kedas vizita Estadiu Football Gleno Ermera hodi marka nia prezensa ikus no hetan omenajen husi estruturu Asosiasaun Football Ermera, jogador no treinador foofball sira, no kontinua ba kedas edifisiu Asosiasaun Veteranu Munispiu Ermera. Hafoin husi ne’e, aranka kedas ba Nunutali, fatin ba halot isin ba rohan laek nian.
Jornalista www.lifaupress.com observa, durante vizita ikus iha sidade Gleno, Ermera, matebian nia kaben, oan sira, la iha forsa atu husik ema ne’ebe sai sira-nia airin atu satan no hamahan aan, ne’ebe hadomi tebes tebes familia durante nia moris.
Matawen no tanis halerik, mak espresaun kle’an husi familia no belun sira, no komunidade sira ne’ebe hamrik iha estrada ibun ne’ebe mate isin liuba, husi Nunutali ba Gleno no husi Gleno fila-fali ba Nunutali, fatin deskansa ikus. Adeus, Adeus, Adeus – belun di’ak. (*)
