Reportajen Celcia Magno
VENILALE (lifaupress) : Autoridade lokal liuhusi Diresaun Sekretariu Estadu ba Igualidade SEI, durante ne’e apoiu ona fundus transferensia publiku ba grupu feto vuneravel no ho ema difisiensia sira iha suku 4, kompostu husi suku Bado-Ho’o, Uai-laha , Uai-Oli no suku Uma-Ana-iku ba .
Total fundus kompostu husi grupu prepara ba futuru iha Suku Bado-Ho’o ho orsamentu $2.000, rupu Cubina Remaja, Suku Uai-Laha ($2.000), grupu Hahu iha Suku Uai-Oli ($2.000) no grupu Mudansa ba Moris iha suku Uma-Ana -Iku ho ho orsamentu $1.500.
Grupu benefisiariu sira nia aktividade mak rai no impresta osan, hodi sustenta nesesidade uma laran no mos ba oan sira nia futuru.
Pontu Fokal Postu SEI, Jucelina Ximenes Belo informa ida ne’e ba Jornalista online www.lifaupress.com iha area Caicoli, aldeia Uatu-Asa, suku Uatu-Haco, postu Administrativu Venilale, Munisipiu Baucau, Sexta feira (10/05/2024) tuku 10.00 dader OTL.
Diresaun SEI mos halo asesmentu ba feto vuneravel sira iha area Caicoli Suku Uatu-Haco, Venilale hodi enkoraja maluk feto sira atu iha nafatin forsa, hodi hasoru dezafis oioin durante tinan hirakliu ba.
“Programa SEI ne’e atu hakbiit feto sira-nia ekonomia, hodi prevene violencia bazeia ba jeneru , promove partisipasaun iha vida politika hodi foti desizaun no kontribui ba dezenvolvimentu nasional ne’ebe justu no equitativu, ” Pontu Fokal SEI, Jucelina dehan
Nia mos dehan, SEI nuudar makina Governu ne’ebe profesional atu halo advokasia, hodi asegura politika, lei ba programa orsamentu estadu ne’ebe iha sensibel jeneru no inkluzivu sosial iha nivel nasional to’o munisipiu lokal.
Feto vuneravel sira, durante ne’e nafatin apoia programa sira nebe SEI hala’o ona. Nune bele buka moris rasik, hodi hakbit situasaun sosiu ekonomiku ba grupu vuneravel sira seluk, ba futuru. (*)
