Reportajen Celia Magno
VENILALE:(Lifaupress) : Sarani kuaze atus ba atus selebra aniversariu Paroquia ba Ilhas Sagrado Coracao de Jesus Venilale, Baucau ba dala 33, Sabadu (26-07-2025) tuku 09.00 dader. Selebrasaun ne’e simboliza liuhusi Misa agradesementu, prezide husi Amu paroku, Carlos Fernandes, SDB.
Antes selebrasaun ne’e, Mahein “Sagrado Coracao De Jesus Liurai no Mahein Povu no Sarani Venilale lori vizita estasaun kapela ida-idak iha postu Venilale durante kalan rua no loron rua.
Iha vizita ne’e, sarani sira hasa’e orasaun, no mos iha selebrasaun Sakramentu Baptismu Eukarestia no sakramentu Matrimonio ba uma kain foun sira iha kada estasaun.
iha nia Homilia, Amu Paroku Carlos Fernandes hateten liuhusi imajen ne’e, Jesus nia fuan reprezenta iha nia totalidade nuudar Maromak halo an ba mane iha Misteriu Inkarnasaun no atu orienta sarani sira – nia fuan ba Kristu – ba Maromak no ema loos ba adorasaun ba Kristu rasik nia fuan.
” Husu sarani sira atu nafatin fiar ba Jesus Kristu, liuhusi orasaun no adorasaun ba ilhas ida ne’e, hodi fo hanoin nafatin domin prezensa. Tanba Maromak hadomi no konese ema ida-idak no folin tebes ba nia bibi atan sira,” Amu Carlos Fernandes SDB .
Amo hatutan, Maromak niad Domin ba sarani laos ho liafuan de’it maibe hatudu liuhusi hahalok hein bibi atan sira, fo moris ba ema hotu no fo an ba mate hodi salva ema hotu nia sala.
Iha misa ageadesementu ne’e, labarik sira simu sakramentu Eukarestia. No hafoin misa, autoridade konsellu suku, madre, padre no sarani sira, selebra Ilhas Sakrojes ho kua kek, han hamutuk no hatudu a dansa kultura no babadok iha eskola Santa Maria Mazarela Venilale. (*)
