Reportagen : Osterlia Muni
DILI – (Lifaupress): Polisia Nasional Timor-leste (PNTL) kaptura sidadaun na’in tolu, kompostu husi ema na’in rua ho inisial ALP no ITSR no membru PNTL ida ho inisial ASG, ne’ebe diskunfia involve hatama sasan kontra bandu husi Batugade, area fronteira ho nasaun Indonesia.
Diretór Diresaun Investigasaun Kriminál Nasionál (DIKN), Superintendente Polísia João Belo dos Reis hato’o ida ne’e ba jornalista liuhusi konfenrensia imprensa iha Dili, loron hirak liuba.
“Ita nia sidadaun sira importa sasan konyra bandu husi Fronteira Batugade. Ita kaptura no agora daaun detein iha Sela DIKN,” Superintendente Polísia João Belo dos Reis inform aba jornalista sira iha Kuartel Jeral PNTL Kaikoli, Dili, Segunda Feira (28/07/2025).
Sasan ne’ebe ema na’in tolu hatama illegal mak Bebidas Cocacola Kaisa 132, Sprite kaisa 126 no Vitamina Orange ho Marka You C1000 hamutuk dos 52.
“ Sasan sira ne’e prende hela iha Diresaun Investigasaun Kriminál Nasionál no sei aprezenta ba Ministeriu Públiku (MP) Maliana, tanba nee area juridiku Munisípiu Bobonaro,” nia dehan.
Kona-ba involvimentu membru PNTL ida, nia esplika, “Husi indentifikasaun nee ita-nia membru PNTL husi Komandu Munisipiu Ermera, fasilita kareta ida ba tula sasan. Agora iha hela investigasaun nia laran, hodi hatene tanba saida mak nia ba? No tanba saida mak nia tula? Ida – ne’e prosesu investigasaun sei la’o hela,” Diretór Diresaun Investigasaun Kriminál Nasionál (DIKN), Superintendente Polísia João Belo dos Reis esplika.
Belo mos reafirma, karik membru PNTL ne’e involve iha kazu ne’e, Komando Jerál PNTL sei foti medidas regulamentu Dixipliñar ho akuzasaun krime.
“Sira komete Fraglante de litu, tanba importa sasan kontra bandu husi nasaun viziñu Indonesia mai territóriu nasionál liuhusi tereste,” nia dehan tan. (*)
