Reportajen: Selestinho Mani Falo
OE-CUSSE – (Lifaupress) Presidente Autoridade ba Rejiaun Administrativu Espesial Oe-cusse Ambenu (PA-RAEOA) Rogério Tiago de Fátima Lobato, Segunda-Feira (02/12/2024) dirize isar bandeira RDTL ba semana dahuluk, iha kampu Oebau, suku Costa Postu administrativu Pante Macassar, RAEOA, atu taka fulan ikus ba tinan 2024.
“Ha’u hakarak husu ba imi funsionariu hotu atu servisu ho laranno domin tomak hodi foti ita rai Oe-cusse liu husi imi nia esforsu, apoiu solidariedade, ita sei halo Timor-Leste sai bo’ot, no povu Atoni Oe-cusse moris orgullu”, PA-RAEOA, Rogério Tiago de Fátima Lobato, liu husi nia diskursu iha seremónia isar Bandeira Nasionál iha Kampu Futebo Oebau, suku Costa, Postu Administrativu Pante Macassar.
Nia hateten, maske ho osan uitoan-uitoan ita halo rai Oe-cusse la’o ba oin, Oe-cusse nakloke ba ema hotu, simu ema hotu, ema bo’ot no ema Ki’ik simu hotu, ita labele kria fronteira entre ita.
“Ita fulan-fulan, dala ida iha fulan ida, ita hasae Bandeira Nasionál. Bandeira Nasionál ne’e símbolu nasionál, símbolu RDTL. Iha funu naruk ne’ebé ita halo desde 1975 to’o 1999, ita halo sakrifisiu bo’ot, ne’ebé ema rihun ba rihun lakon vida atu manan Bandeira ida ne’e, no símbolu ida mak Pátria Pátria, bainhira hasae bandeira tenke kanta Patria-patria”, nia salenta.
Enkuantu, Seremónia Isar Bandeira Nasionál RDTL iha loron 2 fulan Dezembro 2024, organiza no responsabiliza máximu husi Sekretária Regionál ba Edukasaun no Asuntu Sosiál (SREAS).
Isar Bandeira ne’e, hanesan obrigasaun moral husi Autoridade RAEOA hodi realiza kada fulan iha primeira semana, atu oinsa bele motiva Atoni oan hotu hodi valoriza no respeita heróis da patria sira ne’ebé lakon vida ba Rai ida ne’e. No ita sira ne’ebé sei moris kontinua hatudu nafatin sentidu nasionalizmu no patriotismu ba Repúblika Demokrátika Timor-Leste.
Hanesan publika liuhusi akun offisial facebook media SREAS neebe jornalista www lifaupress.com assesu, Seremónia Isar Bandeira Nasionál ba fulan ikus, tinan 2024 partisipa máximu husi Funsionáriu Sira husi Instituisaun hotu iha RAEOA, PNTL, FFDTL no seguransa Civil.
Depois de Seremónia Isar Bandeira Nasionál iha, Adjunto Komandane PNTL RAEOA, Angelho Quelo, hato’o apresiasaun ba SREAS nia preparasaun hodi realiza Serimónia Isar Bandeira la’o ho susesu.
“Parabéns ba Sekretária Rejionál ba Edukasaun no Asuntu Sosiál ne’ebé organiza ona Isar Bandeira Nasionál iha primeira semana fulan Dezembro. No ha’u husu ba funsionáriu hotu atu tama ba tinan foun 2025, bainhira iha primeira semana kada fulan ita hotu tenke uza Xapeu Timor-Leste bainhira partisipa iha Isar Bandeira Nasionál kada fulan,” dehan, Adjuntu PNTL RAEOA. (*).
ISAR BANDERA : mbiente Loron Isar Bandera insu Dezembru (2/12/2024) iha Kamu Oebau, Oe-cusse, prezidi direta husi Prezidenti Autoridade RAEOA, Rogério Tiago Lobato. Foto LP/SRES
