Reportajen Celcia Magno
VENILALE (lifaupress) : Tempu udan, mota Buihulu Suku Uai-Oli, Venilale, Baucau, sai obstakulu no risku boot ba movimentu komunidade no transporte sira, tanba seidauk iha ponte.
Administrador Postu Administrativu Venilale, Jose Freitas Boavida informa ida-ne’e ba Jornalista online lifaupress.com iha Salaun Centru Convencao Baucau, Sexta Feira (19/04/2024) tuku 2 loraik OTL
Atu asegura movimentu ema no transporte lorloron iha tempu udan, presiza tebes no urjente, konstrusuan ponte Buihulu. “ Dalaruma ema labee halo servisu, tanba de’it mota boot,” Administrador Jose Freitas Boavida dehan .
Kona – ba konstrusaun Estrada iha suku, ema numero um fulan tolu ona iha Postu Aministrativu Venilale hateten, atualmente iha hela prosesu hari estrada estrada iha aldeia no suku.
Nia mos rekunhese, komunidade sira koopera di’ak iha prosesu dezenvolvimentu, liuhusi Programa Nasional Dezenvolvimentu Suku – PNDS. “Hakarak Dezenvolve lao di’ak iha Postu Adminstrativu Venilale, komunidade sira presiza kontribui atu bele moris di’ak. La’os hare de’it husi Governu,” nia dehan tan.
Atualmente, pursentu 75 husi populasaun Venilale, moris ho vida agrikultura, liuhusi halo natar no toos hodi sustenta familia-nia moris .
“ Tempu udan agrikultor sira halo natar no tempu bailoron halo to’os hodi kuda batar, modo , aifuan no seluk tan,” Jose Freitas Boavida hateten tan.
Postu Administrativu Venilale Iha nia Luan 138,43 km² . Total populasaun 23,027 iha Aldeia Hamutuk 35, suku 8 kompostu husi Suku Uatu-haco, Uai-laha ‘Uma- Ana -iku, Uma -Ana -Ulu, Bahamori, Bado- Ho’o, no Suku Fatulia. (*)
