Reportajen: Jacinta Mendes Gonçalves
Dili ( lifaupress) : Maske hasoru dezafiu barak, desde husi aan husi okupasaun Indonezia tinan 25 no tempu Restaurasaun Inpedendensia tinan 22, Governu Timor-leste konsege atinji progresu iha dezenvolvimentu, liuliu infraestrtura.
Eis Xefe Estadu Maior Jeneral F-FDTL, Major Jeneral (Reform) Tito da Costa Cristóvão alias Lere Anan Timur
Eis Xefe Estadu Maior Jeneral F-FDTL, Major Jenera (Reform) Tito da Costa Cristóvão alias Lere Anan Timur espresa ida-ne’e ba jornalista sira, semana liuba hafoin partisipa Seminar ida iha Universidade Timor Orientaln(UNITAL), Dili.
Seminar Nasional ne’e realiza iha Kampus UNITAL, hodi selebra loron Aniversariu Proklamasaun Independensia ba dala 49 (28-11-1975 – 28-11-2024). Liuhusi seminariu ne’e, refleta povu-nia lian, hodi hametin soberania esperitu Fálintil luta ba libertasaun pátria.
“ Depois Restaurasaun Independensia, Timor – leste atraveza situasaun difísil. Povu Maubere moris iha situasaun difísil. Tinan barak ona ita – nia ukun na’in sira ne’e, be troka malu, partidu sira troka malu, labele halo buat ida boot. Buat barak ne’e balun di’ak no balun ladi’ak. Bele dehan, ita – nia estadu Timor -leste iha dezafiu barak, maibe halo buat barak mos, liuliu ba enfraestrutura, rekursu umanu, Timor oan Sira hadomi malu atu kria paz, ” Lere Anan Timur dehan.
Oinsa komentariu ba komemorasaun aviversariu proklamasaun Independensia tinan ne’e? “ Ba tinan ida – ne’e, ha’u hanoin ita-nia komemorasaun la’o hela de’it. Maibe, balu hanoin ita komemora atu festeza, halo festa, organiza jantar, mais la’os esensial mak ida-ne’e. Buat esensial mak komemorasaun ne’e sai momentu reflesaun,” nia dehan.
Momentu refleksaun ne’e, tuir Lere Anan, signifika halo oinsa atu jerasaun funu nian no jerasaun post konflitu, n oferese onra ba martires no heroi sira, hafolin ho ra’an no isin – sira ne’ebe fakar no soe lemo-lemo atu ohin – loron Timor Leste bele sai nasaun soberania,independente iha mundu raiklaran. (*)
