Reportajen Jacinta Mendes Gonçalves
NASUTA (lifaupress) : Familia boot husi Uma lisan Legimea Ainapa, selebra loron finadu liuhusi kari ai-funan ba matebian sira-nia rate, Sabadu (2/11/2024) iha semiteriu Aldeia Tetisari, suku Ulmera, Postu Administrativu Bazartete, Likisa.
Sermonia kari ai-funan no sunu lilin ne’ebe realiza kuaze tuku 05.00 loraik ne’e, la’o hakmatek tuir kustume no tradisaun kultura nian ne’ebe Avó beiala sira husik hela.
Tuir observasaun jornalista www.lifaupress.com, iha serimonia kari ai-funan ne’e, lia- na’in husi Uma Lisan Legimea Ainapa, Marçal Gonçalves oho animal no tau hahan iha rate leten, hodi hatudu sentidu domin ba matebian sira.
Kada tinanfamilia husi uma lisan Legimea Ainapa tau hahan hodi hasé matebian sira, husu forsa no kbiit atu kontinua akompana familia no beioan sira ne’ebe sei moris iha mundu.
Entretantu Amándio dos Santos, nudar oan mane boot iha uma lisan Legimea Ainapa esplika, bainhira to’o ona loron finadu, familia boot Uma Lisan lori lilin, ai-funan, tabaku,bua – malus ba vizita beiala sira- nia rate.
Bainhira remata kari aifunan no sunu lilin, ho Lia dadolin husi lia nain Marçal Gonçalves – husu lisensa atu konvida familia sira – fila ba uma lisan hamutuk, hodi han – hemu molok fahe malu ba idaidak nia uma.
Iha fatin hanesan, Aurelia Maria dos Santos nuudar responsável ba halo orasaun, husu ba familia sira hakmatek, hato’o orasaun espesial ba familia sira ne’ebe se’i moris no reza ba Maromak, atu fo bensaun, domin no laran luak atu kasu matebian sira-nia sala iha ahi purgatóriu no lori sira ba Lalehan. (*)
