VENILALE (lifaupress) : Eloshya, hatene buka moris rasik, husi idade 13. Maske tinan ki’ik, la moe atu fa’an mina Gazolina iha estrada ibun. Atividade ne’e, nia hala’o hafoin sai eskola, hodi ajuda avo feto buka osan ba nesesidade uma laran.
Tuir observasaun jornalista online www.lifaupress.com, kada loron Eloshya ho nia Avo feto Joaninha Guterres Magno, fa’an mina gazolina ne’ebe enxe iha aqua sira. Iha uma ki’ik ida simples, alin minoridade ne’e ho nia Avo uza atende kliente komustivel sira.
Atualmente, Eloshya iha ona 2°Ano Eskola pre-sekundatriu. Ba jornilista online www.lifaupress.com, Kinta feira (05/06/2025) iha aldeia Lia-oli, Suku Bahamori, Postu Administrativu Venilale Baucau, Eloshya Carla Dias Amaral hateten. ” Ha’u sempre ajuda avo feto ba servisu saida deit. Alende fa’an mina gazolina, halo mos servisu uma laran no fa’an ai-fuan sira balun hodi hetan netik osan’ “Eloshya dehan.
Ho oin hamnasa midar, Eloshya espresa la sente baruk no la kolen hodi fa’an mina loron-loron iha estrada ibun, area Lia -Oli, suku Bahamori, Postu Venilale, Baucau.
Kada loron, bainhira sai husi eskola tuku 12.00, to’o uma troka no tau tiha pasta ho lalais, liu kedas ba hein negosiu mina, nune’e avo feto mai fali uma, deskansa no han meudia. “ Ami rua hela mesak, ajuda malu fa’an mina iha estrada ibun to’o kalan tuku 7 kalan mak foin fila ba uma,” nia dehan.
Dadersan tuku 6, molok ba eskola, Eloshya ba uluk Estrada ninin tau mina iha estrada ibun. Tuir mai Avo feto mak fa’an husi dader.
Rendimentu kada loron, dalaruma atinji $ 8.00. Tanba depende ba komprador sira nia nesesidade. Maske nune’e, la hamate Eloshya ho nia avo feto nia espiritu fa’an nafatin mina iha estrada ibun. Dalaruma fa’an mina to’o semana rua lae liu, mak hotu. Hafoin ne’e, ba hola fali iha pertamina Baucau.
“Ha’u gosta hala’o atividade ne’e, la senti moe ba kolega eskola sira.Importante ajuda Avo hodi hetan osan ba nesesidade uma no eskola,” nia dehan. Elosyah nia Apa – Ama, alin, Tia ho Apa ki’ik sira hela hotu iha Dili.
Alemde badinas ba eskola, halo negosiu, Eloshya mos badinas ba Misa iha Loron Domingu. Nia mos tuir oratorianu iha Kapela Lia-Ho’o, Sao Miguel Arcanjo.
Eloshya hela ho nia avo feto husi ki’ik, bainhira tinan ida. Nia moris iha Dili. Maibe tanba nia sei bebe hetan moras, nune nia Avo feto mai haki’ak no tau – matan ba nia iha Venilale, Baucau.
Entretantu Joaninha Guterres Magno, nuudar Eloshya nia Avo feto hateten, “Hau ho bei oan fa’an mina hodi sustenta ba uma laran balun ba lia kultura, duke tane liman hela deit ba oan sira – ne’ebe ba servisu dook iha Dili no rai liur. Sira mos forma uma kain balun sei eskola no bei oan mos barak tebes,” nia dehan.
Avo Joaninha Guterres Magno nia kaben mate kleur ona – kuaze tinan 24 liu ba. “ Bainhira ona sira sei ki’ik, Inan-aman esforsu husi fila – liman to’o sira susesu hotu iha eskola sekundariu, balun universidade to’o gradua. Balun servisu ona to’o halo uma simples mai ha’u,” Joaninha dehan. (*)
