Reportagen: Osterlia Muni
DILI (Lifaupress): Kandidatu trallador timoroan na’in 82, desde tinan 2022 hein atu ba servisu iha Korea du Sul. Kauza husi atrazu ne’e, tanba kompania sira iha Korea Sul seidauk halo kontratu servisu.
Porta voz kandidatu Traballador timoroan, Rozalino da Costa ba jornalista sira iha edifisu SEFPE Becora, Dili, Karta-feira (02/04/2025) hateten, naran husi kandidatu raballador sira-ne’e, tama no aprova tiha ona iha Sistema.
“ Maibe kontratu mak ami seidauk hetan husi kompania. Ami periodu iha 2022, ne’ebe sei servisu iha area pescas. Dehan ami-nia dokumentu aprova ona, maibe kntratu mak seidauk hetan husi kompanhia “ nia esplika.
Kandidatu traballador sira ne’e, marka prezensa iha SEFOPE Becora, hodi hatene informasaun loloos, kona – ba kontratu servisu husi Korea du Sul mai Timor-leste ona ka seidauk. “ Ida – ne’e mak ami husu klarifikasaun , atu bele hatene kle’an liu tan ba ami-nia estatutu agora nee,” Porta Voz Rozalino da Costa informa.
Entretantu Direitor Diresaun Empregu Estranjeiro, Joao Correia Pereira hateten, kandidatu. Traballador tinan 2022 ne’ebe pasa ona teste kuaze na’in 1,963. Husi numeru ne’e, kuaze ema 1,200 asesu ona serbisu iha Korea du Sul.
Atualmente, iha kandidatu na’in 4,000 resin mak seidauk hetan oportunidade serbisu. Aplikasa servisu liuhusi sistema ne’e, inisia aplikasisaun maihusi nasaun 16 ka 17, la’os ba Timor – leste deit.
Nia mos eplika, regra ne’ebe Governu Korea hatur mak, bainhira pasa ona iha sistema rejistada ba ona sistem Korea, nia durasaun tinan rua la hetan oportunidade ka seidauk hetan selesaun husi empregador, kandidatu sira bele fila – fali ba sistema normal, liuhusi rejistu no tuir teste , atu bele submete sistema hodi bele hein oportunidade.
“ Programa ho sistema ne’e la’os foin implementa maibe hahu husi 2009 too agora. Personal sistim Korea nee, ita hein deit ita ba Korea ka lae. Ne’e depende ba empregador sira ne’ebe mak hili ita, “ Direitor Diresaun Nasional Empregu Estranjeiru (DNEE) SEFOPE, Joao Correia Pereira dehan ba jornalista, sira iha SEFOPE Becora, Dili, Kuarta-feira (02/04/2025).
Nia dehan, durante ne’e DNEE halo esforsu lubuk ida ona. “Ami halo ona. No por volta ema na’in 6,000 resin mak hetan ona oportunidade, “ Diretor DNEE Joao Correia Pereira esplika.
Servisu hotu ne’ebe oferese ba traballador timoroan, Joao Correia Pereira hatutan, bazeia de’it ba Kompanhia sira-nia desizaun. Timoroan ita tenke preparadu. Tanba teste hotu-hotu mai direta husi empregador sira. Empregador sira iha interese rekruta timoroan, depende sira. Desde 2009 to’o 2025, sira ne’ebe hetan profil di’ak, bele hetan oportunidade lalais.
To’o tinan 2025, timoroanoan kuaze na’in 18.000 ona mak SEFOPE haruka ba servisu iha estranjeiru, liuliu iha Australia kuaze ema 6.000 resin, Korea du Sul, mos kuaze ema 6.000 resin no ba Japaun foin mak na’in 31. (*)
