Reportagen: Osterlia Muni
DILI – (Lifaupress): Governu Japaun, Kuarta-feira (09/07/2025) semana ne’e iha Dili, apoia Roo haat ba Polísia Nasionál Timor-Leste (PNTL), atu fasilita servisu di’akliu tan Unidade Polísia Maritima (UPM) atu asegura no vizilansia via Maritima.
Komandante Jerál Polísia Nasionál Timor-Leste (PNTL), Komisariu Jerál Polisia (Komjerpol), Henrique da Costa hateten, alende oferese Roo 4, Japaun mos pronto halo manutensaun ba Roo sira.
“ Governu Japaun oferese Roo no prepara mos ba manutensaun, atu nune’e hadia efeitu no kapasitasaun ba UPM nian,” Komandante Jerál Polísia Nasionál Timor-Leste (PNTL), Komisariu Jerál Polisia (Komjerpol), Henrique da Costa deham tan.
Governu Japaun liuhusi Ambaxada Japaun iha Dili, haruka ona ekipa tékniku halo survei ba fatin ne’ebe utiliza ba atrakasaun Roo sira, mak fatin Beakou no Kuartel UPM iha Dili.
“UPM Munisípiu Lautém, Covalima no Rejiaun Administrativa Espesial Oe-Kusse Ambeno (RAEOA) mos presiza, maibe Governu Japaun sei tau prioridade ba Beakou ho Komandu UPM Dili,” nia hateten.
Komandu Jerál PNTL sei jere ba fatin sira seluk ne’ebe presiza\ halo vizilansia ba tasi, liu-liu ba peska ilegal .Governu Japaun liu-husi JIKA mos apoiu ona buat barak mai iha institusaun PNTL.
Entretantu, Embaixadór Japaun mai Timor-Leste, Kimura Tetsuya agradese tebes ba Polísia Nasionál Timor-Leste ho JIKA nia kooperasaun serbisu, hodi oferese Roo 4 ba PNTL liu-husi Unidade Polísia Maritima (UPM).
“Ami fiar katak patrollamentu seguransa Maritima esensiál ba nasaun Timor-Leste nia prosperiedade no estabilidade. Tanba fronteira marítima seguru ne’e importante tebes, atu proteze soberania nasionál no atu salva guarda rekursu tasi. Presiza servisu atu kombate atividade ilegal sira, liu-liu peska ilegal sira no garantia seguransa Maritima,” Embaixadór Japaun mai Timor-Leste, Kimura Tetsuya hateten.
Japaun ho Timor-Leste iha historia kooperasaun iha setor seguransa. Governu Japaun apoiu PNTL hodi fo formasaun kona-ba deteta Peskas ilegal sira. Roo 4 iha nia dezempeña ho nia treinamentu fo vizilansia ba kosteira Timor-Leste.
Iha parte seluk, Diretor County JIKA Timor-Leste, Fukumori Daisuke hateten, JIKA apresia lideransa Komandu Jerál PNTL , kooperasaun ho Polísia Federal Australianu, kongratula kompromisu Timor-Leste, liu-liu ba parte integrante sira – nia formulasaun susesu ba projetu ida-ne’e.
“Durante períodu implementasaun esbosu projetu nian, JIKA hein atu fornese Roo 4 no ekipamentu relevante, “ nia dehan. JIKA mos sei haruka paritus tékniku atu hala’o formasaun ba operasaun no jestaun relatóriu roo sira nee.
“ Ha’u fiar katak buat ne’ebé importante liu ba projetu ida – ne’e mak envolvimentu no aprendizajen kontínua ida-idak nian, atu hasa’e kapasidade institusionál, operasaun ba jestaun efetivu iha baze lorloron,” nia dehan,
Alende ne’e, hasa’e monitorizasaun seguransa, hodi kontribui signifikativamente atu rezolve di’akliután peskas ilegál no u promove liután Governu – nia inisiativa ekonomia. (*)
