Reportjen: Mariano Do Santos Abi
DILI (www.lifaupress.com) – Serimonia Asina Akordu de Resolusaun no Revisaun ba Akordu Operasaun Konjunta entre TIMOR GAP ho Timor Resource ba produsaun mina iha rai maran.
Area produsaun mina rai maran ne’e iha TL-OT-17-08 Bloku Rai Maran A iha Munisípiu Covalima ho TL-OT-17-09 Bloku Rai Maran C iha Manufahi no Ainaro, liga ho antes ne’e TIMOR GAP ho Timor Resource asina kontratu fahe produsaun (PSC) ho Autoridade Nasional do Petroleo (ANP) iha 2017 ba área rai maran nian, PSC TL-OT-17-08 no PSC TL-OT-17-09 no sai parseiru ho persentajen 50:50 ho Timor Resource sai hanesan operadór.
Tuir Ministru Petroleu no Minerias Rekursu (MPMR), Francisco Monteiro agradese TIMOR GAP ho Timor Resource, tanba finalmente konsege konsege resolve problea ne’ebe pendent durante tinan barak nia laran, liuliu kona – ba diferensia intepretasaun .
“ Agradese tanba imi konsege hetan soluasaun ba problema ne’e, “ Minisru PMR, Francisco hato’o lia hirak ne’e durante diskursu iha Serimonia Asina Akordu Resolusaun no Revisaun ba Akordu Operasaun Konjunta,entre TIMOR GAP ho Timor Resource iha Orchid Room, Andar 5, Timor Plaza, Dili, Kinta (02/05/2024).
Nia dehan, desizaun ho TIMOR GAP, tanba hanesan kompañia iha kapasidade bussines ne’ebe presiza hatur planu didi’ak ho buka parseria, hanesan kazu konkretu parseiru ho Timor Resource.
Hefoin asina akordu nee, parseiru rua ne’e hala’o serbisu tuir komprimisiu sira ne’ebe hatur iha PSC, hodi kompleta akizasaun 2D seismiku iha área rai maran A no area rai maran C. Parseiru rua kontinua hala’o perfurasaun eksploratório iha área rai maran A no kompleta posu eksplorasaun tolu (3) entre tinan 2021 no 2022, mak hanesan posu Karau no Kumbili iha fim do 2021 no posu Lafaek iha Setembro 2022.
Resultadu husi posu eksplorasaun tolu (3) ne’e, hatudu diskoberta hidrokarbonetu ho nia tipu likido hanesan óleo no gas ka kondesadu. Iha Novembru 2023, ANP anunsia resultadu hirak ne’e hanesan “diskoberta tekniku”.
Hakat ba oin, parte rua, TIMOR GAP no Timor Resource konkorda ona hodi resolve diferensia sira ba interpretasaun komersiál nian. Iha loron 13 fulan Marsu 2024, IX Governo Konstitusional liu husi Konsellu de Ministrus (KM) ,aprova ona resolusaun ligadu ba proposta ne’ebé apresenta husi TIMOR GAP, hodi rezolve problema komersiál ho nia parseiru. Ne’e duni, permite TIMOR GAP hodi asina dokumentu legal sira hodi hatur fali dalan ba oin.
Depois de diskusaun lubuk ida, parte rua finalmente aliña malu no ho asina akordu de resolusaun no revisaun ba akordu operasaun konjunta (JOA) Kinta (02/05/2024). Parte rua sei serbisu hamutuk hodi kontinua komprimisiu sira iha PSC, inklui perfurasaun avaliasaun iha area rai maran A atu determina diskoberta komersial husi posu hirak ne’e.
Tanba ne’e maka, membru Governu ne’e mós alerta katak, hamutuk respeita malu, hodi solusiona karik iha diferensas ruma. “ Ida-ne’e sai lisaun ida ba TIMOR GAP. Maibé ne’e ba bussines hotu iha Timor katak, tama entre bussines, liuliu bainhira halo parseria, maske iha diferensira tenki hamutuk nafatin buka solusaun, hodi ikus mai ita implementa iha ita nia hakarak hamutuk iha espiritu ida kooperasaun,” Ministru dehan.
Governu simu solusaun ida ne’e, ho kontente tebes, husi prosesu inisiu to’o ohin selebra asinatura. (*)
