Reportagem: Virginia Vidigal dos Santos
LIKISA (lifaupres) : Ensinu Baziku Filial (EBF) 1,2 Hatukesilete, Likisa, atualmente infrenta problema bee-moos. Atu hamenus problema ne’e, Eskola husu estudante sira atu lorloron lori bee Aqua ida ba eskola lorloron.
Koordenador (EBF) 1,2 Hatukesilete, Likisa, Filomino Pereira Santos hatete ida-ne’e ba jornalista sira, iha Likisa foin dadaun, relasiona ho problema bee-moos iha eskola ne’ebe harii iha tinan 2010 ne’e.
” Ami – niahasoru difikuldade bee – moos ba tein no ba haris fatin. Entaun, oronloron ami – nia estudante sira husi 1° to 6° ano mai eskola tenki lori bee aqua boot ida,” Kordenador Eskola Filial ne’e hateten.
Tuir Koordenador (EBF) 1,2 Hatukesilete, Likisa, Filomino Pereira Santos, atualmente total estudante hamutuk na’in 163, kompostu husi mane 97 no feto 66. Problema ne’ebe infrenta tan mak menus ba sala de aula. Atu jere proses aprendizajen lororon, fahe ba klase 1° ano to 3° ano tama dader entre tuku 8:00 to’o 12:00 no 4° Ano to’o 6° Ano tama entre tuku 12:30 to’o 17:00 .
Tuir observasaun jornalista ba Eskola EBF HATUKESILETE, maske eskola nee nia distansia dook husi Uma, estudante sira nafatin ho laran ksolok la’o ba eskola hodi aprende liuhusi prosesu aprendizajen iha eskola ne’e. (*)
KONTENTI : Estudante EBF 1,2 HATUKESI, Liisa hatudu nafatin oin hamnasa no kontenti bainhira iha Eskola. Foto LP/Virginia
