Reportagen : Florentina Bianco da Cruz
DILI— (lifaupress ) : Maske iha diferensia partidiu, balun ukun balun la ukun, na’i – ulun sira presiza hamutuk nafatin, inklui hamtutuk marka prezensa iha serimonia aniversariu Restaurasaun Indepensia.
Joao Barros Amaral hato’o asuntu a nee hafoin serimonia Aniversariu Restaurasaun Independensia ba dal 23, Segunda (20 Maio 2025) iha Palasiu Prezidensial Bairopite, Dili.
“Komemorasaun tinan ida – ne’e ami senti tristi uituan, tanba nai ulun sira balun mai, no balun la mai. Uluk sira hamutuk iha Ai-Laran, sai ema ida de’it. Ikus sira la hamutuk tan de’it atu hadau ukun bá Rai ida ne’e,” Joao Barros hateten.
Tuir Joao Barros, Hanesan povu baibain Husi Munisipiu Manufahi, Joao Barros Amaral hatete, Komemorasaun 20 de Maio tinan 2025 hotu- hotu kontente ho alegria ba Rai ida ne’e povu hakarak hamutuk unidade husi povu.
“Komemorasaun 20 de Maio tinan 2025 ita hotu kontente ba rai ida – ne’e. Ami povu hakarak ita hotu hamutuk, sai ema ida de’it. Tanba Rai ida – ne’e atu ba oin, na’i ulun sira tenke sai ema ida de’it, atu nune’e lori povu ne’e ba oin.
Ba tinan sira tuir mai, selebrasaun Loron Restaurasaun Independensia, 20 de Maiu labele akontese tan hanesan tinan ne’e.
” Ba oin na’i ulun sira tenki sempre hamutuk. Tanba povu sente katak, Timor ukun aan, tanba na’i ulun sira uluk hamutuk iha Ai-laran, ikus – mai hamutuk lori ona povu ba oin,” Joao reafirma tan.
Iha sorin seluk, Deputada PLP, Maria Angelina Lopes Sarmento, husu ba povu Timor-Leste ne’ebé kontribui ou partisipa direita, indereitamente ba prosesu dezenvolvimentu atu kontinua servisu hamutuk, kria paz, establidade hodi fo nafatin konfiansa ba Governu hala’o programa sira atu lori moris di’ak ba povu,” Deptada Angelina Sarmento hateten.
Angelina mos rekunhese, tinan rua ikus povu hasoru dezafiu barak, prinsipalmente iha kapital Dili, tanba povu barak mak la sente sabor dezenvolvimentu, la kontente ho Governu nia politika. (*)
