Reportajen : Celcia Magno
VENILALE (Lifaupress):Faluk oan na’in 4 ho familia hotu, hamonu matawen ba Matebian Elisa Dos Santos ba nia deskansa ikus, hamutuk ho nia kaben Hermenegildo Abel Da Silva Castro iha semiteriu Bahamori, Postu Venilale, Baucau, Segun (30-09-2024) tuku 6:00 loraik OTL.
Antes atu hala’o serimonia funebre ba matebian Elisa iha semiteriu Bahamori ,tuir lisan Kota-Mori ,iha tuku 3 loraik , familia sira hato’o uluk despedida ikus ba matebian ho liafuan dadoli no monu ain, hafoin tula ba ambulansia ba Semiteriu, akompanha husi familia no belun sira ho trasnporte ba Kapela Bahamori, hodi tuir Misa Funevre.
Misa Funevre ne’e, Prezide husi Amu Manuel Da Silva Ximenes, SDB akompanha husi Amu selebrante na’in 5, partispa husi ema kuaze atus ida resin iha kapela Bahamori, tuku 04.00 loraik OTL.
Oan feto na’in 4, sente triste tebes, tanis hanoin Inan ho Aman ne’ebe fila hikas ona ba aman Maromak nia kadunan Santu, husik ona sira mesak.
Liuhusi misa ne’e, hasae orasaun hodi hasa’e honra no Gloria ba sira – nia Inan no simu bensaun husi Amu Manuel. Durante tinan barak, Elisa Dos Santos kuidadu nia oan feto sira, to’o hakotu iis iha Sabadu (28-09-2024) tuku 2 madrugada, tanba moras iha kanuruk.
Hafoin misa, Familia ho oan kiak sira akompanha matebian ba iha fatin deskansa ikus iha semiteriu Bahamori. Bainhira to’o Semiteriu, oan ki’ak sira tanis halerik, tanba sira sente lakon duni ona domin husi Inan ho Aman.
Molok haloot mate isin Elisa Dos Santos, Amu Paroku Venilale, Carlos Fernandes fo bensaun ba fatin deskansa ikus. Adeus …Adeus ..Adeus! Deskansa Em Paz, hakmatek iha Aman Maromak Nia Kadunan Santo. (*)
