Reportazen: Lúcia Ramos Simões Freitas
BALIBO (lifaupress.com): Grupu Dansa Kultura husi Media online Likisa Post, koopera ho Formandu Jornalizmu Baziku Likisa, anima ambiente selebrasaun Loron Nasional Liberdade Imprensa iha Balibo, Bobonaro.
Performas grupu dansa ne’e iha Palku animasaun Tersa-feira (15/10) kalan, hetan reasaun pozitivu husi vizitante sira, ne’ebe marka mos prezensa Prezidenti Konsellu Imprensa, Otelio Ote, Autoridade Postu Administrativu Balibo, editor, jestor Media, komunidade Balibo no jornalista MNC TV, Net.tv, Kompas.com, SCTV no BBC NTT husi proviria Nusa Tneggar Timur, Indonezia.
Xefe Online Notisia Likisa Post Francisco Xavier ba jornalista www.lifaupress.com espresa nia sentimentu orgulho ho oportunidade nee. “ Iha selebrasaun Loron Nasional Liberdade Imprensa ba dala-II tinan ne’e, ami aprezenta animasaun tolu, mak dansa kultura, Dahur Sandole no Poezia ho titulu Balibo La’os Ha’u Knu’uk moris, ” Francisco Xavier dehan.
Alemde halo animasaun, durante estajia iha Balibo, ekipa ne’e mos halo kobertura ba atividade sira iha loron importante. Atividade sira iha Balibo hahu ho Feira Produtu local desde Sedunda – Feira (14/10/2024), Forum Nasional Editor, Tersa-feira (15/10/2024) no selebrasaun loron nasional Liberdade Imprensa – Atribuisaun Premiu Media, Kuarta (16/10/2024).
Iha animasaun dansa kultura, Dahur no poesia, ekipa uza Taís kultura, Belak, kaibauk, mortel, nuudar opurtunidade ida mos atu promove timoroan nia identidade kultura ba mundu.
Entetantu Virgínia Vidigal dos Santos, nudar treinador dansa kultura esplika, molok hatudu dansa, halo uluk preparasaun durante semana ida, hahu 6 to’o12 Outubru 2024. “ Ami prepara aan ho seriu, la’os de’it iha Likisa maibe halo mos treinu Balibo, oras balun antes sa’epalku. Nune’e, bele garante aprezentasaun la’o di’ak no susesu,” Virginia dehan.
Kona-ba atividade kobertura ba atividade Loron Nasional Liberdade Imprensa iha Balibo, Virginia dehan, “ nudar opurtunidade pratika atividade jornalistika, bazeia ba teoria ne’ebe ami hetan husi formandor durante formasaun. Luhusi kobertura, ami bele intende didi’ak knar jornalista nian.” (*)
