Reportazen: Angelina Zela/Televiana Lopes
DILI ( Lifaupress) : Familia Matebian Zizelma Gonsalves hakarak hetan Justisa husi Tribunal Judisial Primeira Instansia Dili (TJPID). Tanba konsidera desizaun Tribunal loron hirak liuba la justu.
Jaime do Rego Gonsalves, aman husi Zizelma reprezenta familia matebian, hato’o lia hirak ne’e iha rezistensia Delta, Loja Funan Buras nia kotuk, Comoro, Dili, Kuarta (2/04/2025).
” Juiz hatun desizaun, ne’ebe familia la simu no laran moras. Ami presiza justisa. Tanba ami-nia oan mate sei la moris fila – fali. Nune’e, justisa ami presiza justisa no lialos,” Jaime do Rego Gonsalves.
AMAN – Jaime do Rego Gonsalves, aman husi matebian Zizelma Gonsalves akompanha husi familia sira, ko’alia durante konfenerensia imprensa, ha rezistensia Delta, Loja Funan Buras nia kotuk, Comoro, Dili, Kuarta (2/04/2025). Foto LP/Angelina
Familia matebian, observa desizaun husi Tribunal Judisial Primeira Instansia Dili (TJPID ), la hare ba faktu sira husi akontesimentu. Tanba, realiza suspeitu konduz motorizada ho velosidade ass to’o soke matebian Zizelma, ne’ebe hakat hela Zebra cross iha area Elemloi, besik Loja Funan Buras Dili.
“ Ami familia hakarak hetan mak justisa. Tanba odi malu no baku malu la vale ona. Agora la’os tempu baku malu. Agora tempu atu hadia. Justisa mak bele rezolve problema. Se Justisa la iha, neneik ba neneik ita kbiit laek sira sei mohu hotu,” matebian nia aman Jaime do Rego Gonsalves reafirma.
Parte seluk, familia husu ba Autoridade Polisia atu investiga lolos mambru Polisia ne’ebe mak sai sasin ba kazu ne’e. “ Justisa labele manobra malu. Justisa iha rai ida – ne’e atu lao ba oin, labele hare mak ema iha osan atu sosa justisa. Ne’e Justisa sei la vale,” nia dehan tan. (*)
