Reportage : David dos Santos (Kontributor)
RAILACO (lifaupress) : Eskola Sekundária Katólika Nosa Señora de Fátima Railaco, Ermera, despede despede profesór voluntáriu, Killien Douville de Fransu, Sesta – feira (12/4/2024) iha resintu eskola ne’e, misaun servisu voluntáriu termina ona fulan Marsu 2024.
Serimonia despedida ne’e partisipa husi Konsellu-profesór sira, servisu na’in no estudante kuaze atus ida resin.
Profesór Killien Douville de Fransu, husu nasaun Fransa ne’e, nu’udar profesór voluntáriu durante tinan ida resin, hahú fulan Marsu tinan 2023. Nia hanorin matéria teknolojia multimedia ba estudante 10-° anu.
Iha okaziaun ne’e, Diretór Eskola Sekundária Katólika NOSSEF Railaco, Pe. Hyoe Murayama.SJ, agradese ba dedikasaun professor Killien Douville de Fransu, durante tinan ida.
“ Profesór Killien, ema ne’ebé iha maturidade, hatene maneja tempu no iha talentu oioin. Obrigadu barak,” Pe. Hyoe Murayama.SJ dehan.
Profesór Killien nia obra sira mesak furak. Tinan kotuk, hanorin matéria inglés ba estudante finalista sira, akompaña maka’as iha matéria teknolojia multimédia no tau-matan ba dormitóriu mane.
“ Ita hare nia rezultadu edita foto no video, kualidade tebes. Bainhira ita asisti video sira ne’ebe nia edita, furak tebes. Ne’e hotu hanesan memória ida,” Padre Murayama, SJ dehan tan.
Padre la haluha atu husu ema hotu agradese ba profesór Killien nia dezempeñu no dedikasaun, aprésia ba grasa ne’ebé ita simu hosi Maromak. .
“ Obrigadu mós ba profesór no estudante sira, ne’ebé akompaña Killien durante tinan ida,”Pe.Hyoe Murayama hatutan nia mensajen.
Entretantu reprezentante estudante kada Turma, hato’o sira-nia lia-menon agradese, deskulpa no obrigadu ba profesór Killien, liuhusi tara taís nu’udar símbolu domin.
Rona tia mensajen agradesomentu sira ne’e, Profesór Killien Douville de Fransu mos agradese ba Maromak, tanba bele to’o rai Railaco, hasoru estudante, meste no ema hotu.
“ Imi hotu no imi-nia rai furak ho imi-nia kultura mos furak. Obrigadu ba Maromak. Agredese tebes ba profesór no estudante sira. Kontenti hasoru imi no servisu hamutuk ,” Killien dehan.
Nia mos rekunhese durante iha Timor-leste, aprende tradisaun Timór nian. “ Ha’u hanorin teknolojia, imi hanorin ha’u kona-ba kultura Timór. Iha ne’e ha’u aprende atu moris simples maibé haksolok, la presiza buat barak hanesan ema riku, ” Killien hateten.
Nia mos agradese ba Diretor Eskola, Amo Hyoe Murayama, SJ,. tanba ho simu iha eskola ne’e. “ Deskulpa karik ha’u labele koa’lia no komprende di’ak imi iha loron-loron, deskulpa karik ha’u la hanorin di’ak.obrigadu ba buat hotu-hotu durante tinan ida iha Railaco,” Killien Douville de Fransu ko’alia ho mata-ween nakonu.
Tuir planu, profesór voluntáriu ne’e sei husik hela Timor-leste ba Fransa, Segunda-feiora (15/4/2024). (*)
