Rortajen : Celcia Magno
VENILALE:(Lifaupress) : Jogador Cristovao Sarmento Guterres husi FC PUBAM JL ho numeru kamizola 13, hatudu telantu joga uniku iha kampu Xanagata Uai-Oli, ne’ebe atrai adeptus sira – nia atensaun. Cristovao nia atrasaun iha jogu komunitariu ne’e, halo adeptu sira hakilar numeru 13.dalabarak
Tuir observasaun jornalista www.onlinelifaupress.com, Jogador ho idade ki’ik ne’e, iha abilidade joga maravillozu. Maske, adversariu taka metin, nia konsege liutiha ‘lutu’ defeza hodi hatama golu.
Desde aributu huu apitu primeiru, jogadir ne’e antusiazmu kedas iha kampu laran. Isin moris atu simu bola no lori bola hodi ataka area defeza no baliza husi adversariu. Maske isin ki’ik, sempre sikat leet hadau bola. No dalabarak, halo jogu ne’e atrativu.
Afinal, Cistovao nia talentu joga desde idade ki’ik kedas to’o agora. Ba jornalista Lifaupresss.com, Cristovao espresa nia mehi hakarak sai jogador profisional iha futuru. “Ha’u,nunka treinu bola hanesan ho jogadores sira seluk. Bainhira iha ami – nia bairu loke torneiu futebool mak ha’u foin ba joga deit ho kolega sira. Tempu seluk, ha’u tenke ajuda Ama halo to’os no natar, hamutuk ho ha’u nia maun ho alin na’in 3,” nia dehan.
Cristovao hapara nia estudu iha Sekunadriu 2°Ano tinan kotuk 2023, tanba kondisaun ekonomia uma laran la sufisiente. Nune’e, nia ba aldeia aldeia Osogori, suku Uatu-Haco, Venilale, Baucau hodi ajuda nia familia sira halo to’os ho natar.
Ba futuru, Cristovao hakarak atu kontinua nia estudu nomos hakarak dezenvolve nia talentu atu sai jogador profisional.
“Husi jogu komunitariu ne’e bele halo ha’u kontenti hodi hatudu ha’u-nia talentu joga. Karik ida-ne’e, mak oportunidade diak ba ha’u, atu autoridade Postu Administrativu Venilale hili ha’u ba joga iha nivel Postu Administrativu, munisipiu nomos Nasional, “ nia dehan tan.
Jogador Cristovao Sarmento Guterres moris iha loron 19 Novembru 2006, husi uma lisan Utapalu, aldeia Osogori, suku Uatu-Haco, Postu Administrativu Venilale, Baucau.
Jogu komunitariu husi suku Uai-Oli, bele animakomunidade sira iha kada bairu no suku. No husi jogu ne’e, bele identifika jogador foin-sa’e sira ne’ebe potesial atu prepara sai jogador Nasional Timor-Leste iha futuru. (*)
