Reportajen : Ynha Araujo
SAME (lifaupress( : Selebrasaun Misa Sabado Aleluia iha Igreja Parokia Nossa Senhora Asunsaun Same, Manufahi hahu tuku hitu (7) kalan, prezidi husi Amo Albino Marques.
Iha nia omilia hateten, iha novu testamentu hateten, Kristu husi mate ba moris hias, Kristu liu husi terus, mate iha krus tutun no moris hias ne’e, atu lori hias ema ba Maromak, sinal domin slvasaun neebe Maromak haraik ba ita ema.
“Liuhusi Jesus Kristu ninia obedese aan tomak ba Aman Maromak nia planu, entaun Kristu hakat husi terus, mate iha Krus tutun. Ne’e sinal atu ema hetan perdaun ba sala , sinal atu ema hetan fali moris foun ida – neebe nakonu ho grasa no domin Maromak nian,” nia dehan.
Sinal nee, tuir Amo Albino, halo ema bele iha ligasaun ho Maromak metin ba nafatin. Kristu liu husi mate atu lori ema ba iha vitoria moris hias. Moris hias nee, atu lori ema hotu fiar iha Nia husi pekadu, husi nakukun hakat ba naroman, ba vida ida neebe nakonu ho Maromak nia grasa, nia liafuan no Maromak nia domin.
Iha parte seluk, Amo Albino Marques mos esplika kona-ba Maromak nia kriasaun. Nia dehan, Maromak kria buat hotu, husi la iha sai iha. Iha livru Janeses, Maromak tau buat hotu tuir nia orden, no Maromak halo ema feto no mane tuir nia imajen.
“ Ema, sai Maromak nia kriatura uniku. Maromak tau mos konsiensia ba ema nee, hanorin atu tetu no halo buat neebe di’ak, tuir Maromak nia liafuan neebe dehan ba sira,” Amo dehan tan.
Maibe, bainhira ema muda, Maromak fo liberdade ba sira atu hili. Ikus – mai, sira desobese ba Maromak, hodi foti fali demoniu ka diabu nia ukun, Nune’e, ema monu ba sala, mak Maromak promete tempu ikus, nia haruka nia oan mane mesak, mai mundu atu soi no salva ita ema.
Tuir istoria ne’ebe hakerek iba Biblia, Maromak liberta povu Ibreu husi atan iha rai Eziptu. Maromak nia lei ba povu Israel husi atan Eziptu nian, sai povu libre Maromak oan nian. Sai povu eskollidu ne’ebe Maromak hili hodi sai nia liman rohan. Bainhira povu ne’e sai husi Eziptu, Maromak halo milagre barak, iha povu nia leet.
“ Iha viajen tomak durante tinan haat nulu, Maromak koko ita – nia fiar, sira – nia seriedade atu fiar metin iha rai Kana’an, ne’ebe Maromak fo ba Abraun, bei oan sira ba nafatin. Nee katak, Maromak soi no salva povu ne’e husi atan, ba fali povu ne’ebe moris livre hanesan Maromak oan lolos nian,” Amo haktuir tan.
Tuir observasaun lifaupress.com , maske kalan ne’e udan boot , sarani Katolika sira antuziasmu partisipa selebrasaun Missa Sabadu Aleluia iha Igreja ne’e. Misa la’o hakmatek tanba hetan siguransa husi eskuteiru sira no Polisia Nasional Timor-leste husi Komandu Polisia Munisipiu Manufahi. (*)
