Dili (Lifaupress.com): Jornalista na’in 85, husi Midia internasional oilin, inklui jornalista timoroan na’in 3 sei akompanha vizita amo papa Francsico mai Timor-leste, Setembru 2024.
Sekretariu Estadu Komunikasaun Sosial, Expedito Loro Dias Ximenes informa ida-nee ba jornalista sira, durante enkontru koordenasaun ho Diretor Media imprimi, eletronika no online sira, Sesta-feira (12/4/2024) di Palasiu Governu Dili.
Marka prezensa iha enkontru ne’e, Prezidenti Konsellu Imprensa, Otelio Ote, Prezidenti KOnsellu Administrasaun RTTL, Jose Belo, Prezidenti Ajensia Notisioza Tatoli, Manuel Manelito, Prezidenti Uniaun Jornalista Profidsional Timor-leste (UPJTL, Horacio Babo, Sekretariu Jeral Timor Leste Press Union (TLPU) Zezito no Xefe Gabinete Secoms.
ENKONTRU : Diretor Midia sira partisipa enkontru koordenasaun kona-ba vista Amo Papa mai Timor-leste, organiza husi SEKOMS, Sesta-feira (12/2/2024) iha salan enkontru Ministeriu Asuntu Parlamentar, Palacio Governu, Dili. (foto Lp/01)
Klaru liutan, Expedito Dias Ximenes esplika, jornalista sira ne’e sei halo viajen ho Amo Papa, nudar mos Xefe Estadu Vatikanu, husi Vatikanu to’o Timor-leste. “ Sekoms sei hili jornalista na’in tolu, ne’ebe iha kapasidade lingua Ingles no Portuges, hodi reprezenta jornalista Timor-leste, viajen hamutuk ho aviaun Amo Papa nian mai to’o Timor-leste,” nia esplika.
Durante viajen, jornalisista sira ne’e, sei partisipa konferensia imprensa husi Amo Papa iha aviaun leten no haruka notisia atu publika iha midia sira iha nasaun idaidak.
Kona-ba preparasaun meius komunikasaun sosial iha Timor-leste, sei koopera ho Konsellu Imprensa atu organiza jornalista sira husi midia oioin halo kobertura, inklui prepara akreditasaun atu asesu ba fatin sira ne’ebe Amo Papa vizita.
Entretantu, Prezidenti Konsellu Imprensa, Otelio Ote reafirma, Konsellu Imprensa pronto koopera ho Sekoms, hodi organiza no realiza prosesu atribuisaun karteira profisional ba jornalista sira-ne’ebe mak seidauk iha.
“ Konsellu Imprensa iha nia mekanizmu rasik, atu atribui karteira porfisional jornalista. Nune’e, tempu sei naton, atu trata asuntu ne’e. Importante mak jestor midia sira aprezenta lista naran, husi jornalista sira ne’ebe mak atu tuir prosesu hetan karteira profisional jornalista,” Otelio dehan.
Ba kobertura vizita Amo Papa, Komisaun organiadora prepara Kartaun akreditasaun ba jornalista, ne’ebe nomeia husi midia ida-ida. Tuir planu, Komisaun organizadora mos sei prepara Midia center ida iha Timor Plaza no ida tan iha area selebrasaun Misa iha Tasi Tolu, Comoro, Dili. (*)
