Reportajen : Celcia Magno
VENILALE (lifaupress) : Organizasaun Rezistensia Sagrada Familia (ORSF) iha tinan 2025 planeia hari programa tolu iha Timor-Leste, mak hametin Edukasaun, Unidade Nasional, Agrikultura no ikus sei hari sede munisipal.
Kordenador Organizasaun Rezistensia Sagrada Familia, Albino Sakoko informa ida – ne’e iha diskursu ba membru sira iha aldeia Uai-Ae, suku Uai-Oli , Postu Administrativu Venilale, munisipiu Baucau, Sabadu (14-12-2024) tuku 11 dader OTL.
Liuhusi programa tolu ne’e, hametin Edukasaun no Unidadade ba jerasaun foun sira, atu hatene klean kona – ba istoria luta ba ukun rasik-an no kontinua banati tuir istoria sira. “Juventude sira mos presiza aprende iha politika dezenvolvimentu, implementa nafatin unidade nasional,” nia dehan.
Iha setor agrikultura, ho objetivu hari ekonomia metin liuhusi koperativa kada grupu, hanesan haki’ak manu,Ikan, halo to’os natar no seluk tan. Alemde ne’e, sei hariiarmajen no ikus i hari sede munisipal postu ida-idak.
Tanba ne’e, Sakoko husu ba membru sira iha Suku Uai Oli atu prepara-an hodi implementa programa sira-ne’e iha tinan 2025.
Atualmente iha ona rai hetares 4 iha munisipiu Baucau no kuda ona batar. Enkuandu rai, presiza konkordansia ho rai nain rasik. Nune’e, ORSF bele iha diretu uza, maibe labele iha direitu sai na’in ba rai no mos bele sosiu ho rai na’in. “Timoroan labele sai ki’ak nafatin. Nune’e ORSf sei implementa programa sira ne’e iha tinan 2025,” nia dehan. (*)
