Reportajen Joao Amaral Oqui.
OE – SILO ( lifaupress ) : Sarani kauze na’in 400 resin partisipa Misa Domingu Ramos, Domingu (13/4/2025) iha Igreja Sagrada Coracao de Jesus Oe-silo, Rejiaun Administrativa Espesial Oe-cusse Ambeno (RAEOA).
Selebrasaun Misa Domingo Ramos ne’e, prezidi husi Padre Dominicus Nahak SVD, partisipa mos husi Madre, Jestor, PNTL, UPF, Xefi Aldeia, delegada, delegadu, Katekista, Grupu bairo sira, grupu JDM no estudante sira.
Iha nia omilia, Pe. Dominicus Nahak, SVD hateten, Jesus mak Liurai ne’ebe sarani sira husu atu ukun moris tomak, inklui ukun ema nia egoizmu tomak.
“ Mai prepara ita – nia fuan, atu hahu selebrasaun Domingu Ramos hodi tama ba Igreja Jerusalem. Ita hotu hakmatek, hodi hanoin fila-fali Jesus Kristu nia terus no mate, atu soi ema hotu nia sala sira,” Amo Pe. Dominicus Nahak, SVD hateten.
Amo esplika, Jesus Kristu mate iha ema aat sira – nia liman. No Jesus mos dehan iha estasaun 12 : “ Hau Aman, perdua sira ba! Tamba sira la hatene saida mak sira halo ba ha’u.”
Bainhira Amo Papa Francisco vizita Timor-leste, tinan 2024, Amo Dominicus ilustra, ema hotu tuir Misa iha tasi-tolu no hakilar Viva Amu Papa Fransisco no Viva Timor Leste, kaer badeira Vatikano, bandeira Timor Leste no ema barak lori sira – nia tais hodi nahe ba estrada ne’ebe Amu Papa liuba.
“ Ne’e mak ohin – loron ita simu no lori Ramos tahan, kaer no hakilar dehan Hosana leten aas ba,” Amo Dominicus dehan. (*)
