Reportajen : Celcia Magno
VENILALE (Lifaupress) : Mota Buihale iha Venilale, lori Ambulansia husi Postu Administrativu Venilale ,munisipiu Baucau, Kuarta- feira, 27 Marsu 2024. Perigu litan, Ambulansia ne’e tula hela Anastacia de Almeida, pasiente gravida ida, atu halo tratamentu iha Postu saude Venilale.
Joanito Vasco Ximenes, kondutor ne’ebe tula pasiente husi Postu Saude Kaulita, Suku Uai Oli, tula mos familia husi pasiente, parteira no infermeira .
Sira sai husi Uai Oli, kuaze tuku 3 loraik. Durante viajen, la’o di’ak . Bainhira to’o mota Builale, tuku 04.0 loraik, hakfodak hare mota tun. Afinal iha area ne’e, la iha udan.
Kondutor tenta hakat de’it mota, tanba hare katak bee ladun boot. Maibe, bainhira iha mota laran ona, bee boot husi mota kontinua tun ho velosidade aas. Kondutor komesa paniku, tanba
Bee mota aumenta boot no dudu makaas kareta ambulansia.
Senti la seguru, desidi atu uza Telemovel kontatu ba Eskuadra polisia Venilale hodi husu ajuda. Polisia mos halo reasaun lalais, servisu hamutuk ho komunidade sira, uza tali dada sai Ambulancia husi mota laran. Graca Maromak nian, konsege salva pasiente no pasajeiru seluk.
Maibe, kareta Ambulancia labele kontinua movimentu, tanba ho kondisaun ladun diak. Nune’e desidi husu ajuda kareta privadu ida, no konsege tula pasiente isin rua ba Postu Saude Venilale Vila hodi halo Tratamentu.(*)
