Reportajen : Florentina Bianco da Cruz
DILI (lifaupress) : Diretor Lighthouse International School, Noel D. Rebuyon agradese ba organizasaun ba Paz husi Korea do Sul HWPL, ne’ebe vizita no liuhusi programa Peace Camp. fahe materia paz ba estudante sira iha Fatuhada, Dili, Kuarta (28/5/2025) tuku 14.00 OTL to’o remata.
FAHE PAZ-– Delegasaun HWPL koopera ho Eskola International Lighthouse Fatuhada, Dili, fahe Edukasaun paz ba estudante sira, Kuarta (28/5/2025). Foto Lifaupress/ Florentina Bianco.
Delegasaun husi HWPL to’o iha Dili, Tersa (27/5/2025) ho aviaun komersial Citylink, liuhusi aeroportu Internasional Prezidenti Nicolau Lobato, Comoro, Dili.
“ Ohin hala’o atividade espesial iha eskola. Ekipa husi HWPL hanorin oinsá sira bele hala’o paz no unidade iha komuniidade nia laran, no hanorin kona-ba lori paz no domin, unidade entre estudante sira,” Diretor Lighthouse International School, Noel D. Rebuyon.
Mensajen husi hanorin paz ne’e, tuir Noel D Rebuyon, mak estudante sira fila ba uma, bele fahe no dezenvolve valor domin, unidade no paz iha familia laran, liuliu ho inan – aman no maun-bin no alin sira.
Entretantu, profesora Claudina da Costa mos senti kontente ho prezensa HWPL iha eskola, hala’o atividade ne’ebé ko’alia kona-ba paz no unidade.
“Ami kontente ho HWPL nia atividade ne’e. Tanba hametin valor umanu, liuliu kona-ba ambiemte moris ho domin no unidade iha eskola no familia,” nia dehan.
Tanba bainhira labarik sira, hatene ambiente domin, paz no unidade husi idada kiik, bele dezemvolve nafatin wainhira sira boot iha futuru. Atualmente, eskola ne’e iha estudante hamutuk na’in 90 no profesór na’in 8. (*)
