Reportajen Celcia Magno
VENILALE (lifaupress) : Padrueiru Sagradu Coracao De Jesus sei vizita Sarani sira iha kapelinha Sao Jose Osogori, Suku Uatu-Haco, Postu Administrativu Venilale, Baucau durante loron rua, hahu Sabadu (12/07) tinan ne’e.
Atu halo preparasaun didi’ak hodi simu vizita Padrueiru Sagrado Coracao De Jesus, Segunda Feira (08/06/2025) liuba realiza ona enkontru preparasaun hodi harii Komisaun Organizadora ne’ebe responsabiliza ba serimonia relijiaoza ne’e.
Enkontru ne’e partisipa husi autoridade sira, kompostu husi xefe aldeia Osogori Inacio Varela, Xefe Uniaun Juventude Osogori UJOG, Pedro Mariano Varela, Koordenador EBC Osogori, Anastacio Varela, Inan – Aman no Juventude sira.
Xefe Uniaun Juventude Osogori, Pedro Mariano Varela ba Jornalista online www.lifaupres.com liuhusi plataforma Watshap esplika, sarani no autoridade sira preparadu atu simu Padrueiru Sagradu Coracao De Jesus.
“Ami sei prepara atividade sira simples tebes, mliuhusi poezia , dansa kultura no tebe-dai. No juventude sira husi Dili sei fasilita Baner ba kapela Osogori,” nia dehan tan.
Nia mos rekunhese, joven balun parese la partisipa serimonia ne’e, tanba iha tempu hanesan balun partisipa ezame no partisipa prosesu aprendizajen. “ Maibe komunikasaun la’o nafatin, atu sir abele jere tempu didi’ak hodi partisipa,” nia dehan.
Parte ida mos husi atividade Junho, mak Sarani sira balun hakbesik ba Kapela Sao Jose, hodi tau – naran ba Katekista atu simu Sakramentu Baptismu primeiru Komuniaun no kaben.
Aliende ne’e, Kapelinha Sao Jose sei hili Katekista foun hodi substitui Katekista Xisto Varela. “ Maibe sei iha prosesu laran no kompetensia husi Paroquia Venilale atu deside iha tinan ne’e,” nia hateten. (*)
