Reportagen : Florentina Bianco da Cruz
DILI— (Lifaupress ): Fokupers kondena makaas kazu asediu sexual ne’ebe diskunfia involve elementu Ministeriu Publiku no husu Prokurador Jeral atu loke prosesu investigasaun imediata.
Kordenador Advokasia FOKUPERS, Natalia de Jesus hato’o liu husi komferensia imprensa iha edifisiu Fokupers-Farol Dili, Sesta-Feira (01/08/2025 ).
“ Fokupers kondena maka’as kazu asédiu sexuál neʼebé envolve elementu husi Ministériu Públiku. FOKUPERS preokupa tebes,” Kordenador Advokasia FOKUPERS, Natalia de Jesus hateten.
Investigasaun ida-ne’e, tenki halo ho transparente no imparsiál liuhusi Konsellu Superior Majistratura Ministériu Públiku ne’ebé lidera hosi Prokuradór Jeräl Republika, hodi garante katak justisa funsiona hodi proteze sobrevivente sira.
Tuir FOKUPERS, asédiu sexual neʼebé envolve elementu iha instituisaun estadu sira, ne’ebé iha responsabilidade atu defende legalidade demokrátiku no estadu de direitu, nu’udar violasaun grave ba públiku – nia konfiansa, estraga mos kredibilidade sistema justisa iha Timor-Leste.
“ Insidente ne’e ezije atensaun urjente no asaun desizivu konkreta no imediata, hodi hatudu katak la iha ema ida mak iha lei nia leten. Kestaun grave husi kazu ida-ne’e no kazu sira seluk iha instituisaun sira, kontinua akontese tanba inbalansu podér,” nia dehan tan.
FOKUPERS konsidera autór iha pozisaun autoridade, nu’udar Prokuradór neʼebé sidadaun sira dalabarak vulnerável no buka apoiu, depende ba sira-nia profesionalizmu no integridade.
Maibe, bainhira uza pozisaun no autoridade ne’ebé lei atribui atu esplora, intimida, ka obriga sidadaun ka vitima sira atu halo interasaun, neʼebé la hó hakarak, ne’e nudar abuzu boot ba podér no violasaun direta ba devér morál husi profisaun.
Alemde ne’e, asédiu sexuál, liu-liu komete husi ema sira neʼebé iha podér, re-traumatiza vitima sira, no haburas ka perpetua kultura nonook no impunidade no halo vitima sira lakon konfiansa ba justisa iha Timor-Leste.
“ Prokuradoria Jerál tenke konsidera no tau atensaun aas, hodi garante investigasaun kle’an ba kazu ne’e no kazu sira seluk. Tenki garante profesionalizmu balansu, nu’udar profisionál hodi garante justisa,” FOKUPERS reafirma tan. (*)
