Reportajen : Celcia Magno
VENILALE (Lifaupress) : Koordenador Komisaun Rekursus Veteranus, Marcal Da Silva ho Kodigu Bessa Uai-Kia inisiativa rasik no osan rasik, hari estasionamentu restus mortais martires da Patria iha bairo Sambere, Aldeia Uatu-Misa, Suku Uai-Oli, Postu Venilale Baucau.
Estasionamentu restus mortais martires da Patria ne’e, harii ho luan ho luan no naruk 6m × 9m no uma bainaka ba familia martires sira ho luan no naruk 6m × 12m.
Veteranus ho kodigu Bessa Uai-Kia hari uma estasionamentu iha fulan Outubro tinan kotuk 2023 liuba ,no ajuda mos husi familia martires sira husi suku Uai-Oli no Uatu-Haco ho material hanesan halibur raihenek no fiziku hodi konstrui uma refere to’o remata ona to’o ohin loron.
Kordenador komisaun Rekursus Veteranus, Marcal Da Silva ho kodigu Bessa Uai-Kia informa ida ne’e ba jornalista www.onlinelifaupress.com iha nia rezidensia Sambere, aldeia Uatu-Misa, Suku Uai-Oli, Postu Venilale Baucau, Sabadu (09/11/2024) tuku 4 loraik OTL.
“Lolos uma ne’e konstrui remata ona iha tinan kotuk liuba, ho durasaun fulan tolu deit. Maibe okupadu ho servisu seluk, nuudar agrikultor, tanba ha’u mesak no badaen na’in rua husi mane foun rasik. Nune’e, uza tempu kleur mak to’o ikus finaliza duni konstrusaun estasionamentu ne’e iha tinan ida ne’e, ” Koordenador Komisaun Rekursus Veteranus, Marcal Da Silva Bessa Uai-kia dehan.
Orsamentu ba konstrusaun uma estasinamentu martires, veteranus Uai-kia uza rasik nia osan. La iha tulun husi Governu no komisaun husi organizasaun. Maibe familia martires sira, halibur raihenek no ajuda ho fiziku deit, tanba inisiativa rasik husi Uai-kia hodi rehabilita uma ba martires sira.
“Ha’u seidauk hetan apoiu balun husi familia martires sira no Governu.Ha’u uza osan rasik ho inisiativa ita hotu nia, hodi konstrui uma iha tinan kotuk to’o remata. Antes ne’e, ha’u atu husu apoiu balun husi familia martires sira, maibe ladun diak. Maske saudozu balun sira estadu rekonese ona hodi simu osan, ha’u husu tulun deit ho fiziku no raihenek ba familia saudozu sira,” nia informa tan.
Antes ba hasai saudozu martires sira, hetan rekonesementu husi komisaun. Nune’e familia sira hasai ruin hamutuk neen, tolu hasai iha matebian tutun postu Quelikai, no tolu seluk hassai iha Samarogo, Ossu Munisipiu Vikeke. Agora dadaun sei iha familia martires sira nia uma, hodi halo tuir kultura ida-idak nian, no hein estesionamentu pronto, hafoin saudozu sira deskansa iha laran.
Bessa Uai-Kia sublinha, “Loloos saudozu martires neen ne’e hatama ona iha estasionamentu restus mortais heroi da patria. Maibe foin lalais familia balun halo pedidu ba Komisaun Nasional Veteranu, hodi halo serimonia kultural lai. Hotu tia mak mai tau iha estesioanmentu. Maibe hein to’o agora seidauk iha resposta husi Komisaun Nasional ba pedidu refere. Saudozu neen nia ruin sei deskansa iha familia sira – nia rezidensia durante tinan ida ho balun ona, ” nia esplika.
Ba martires neen ne’e komisaun nasional veteranus identifika ona no rekonese hanesan martires da patria libertasaun nasional l,no estasionamentu martires seidauk iha kordenasaun ho governu balun, tanba ida ne’e hanesan inisiativa ida hodi halo, hafoin hatama tiha martires sira mak bele informa ba Governu .
Durante konstrui estesionamentu, la iha problema hodi infrenta ba Governu. Tanba iha posibilidade no inisiativa rasik, hodi halo ba martires sira ne’ebe seidauk haloot.
“Problema atu hato’o ba Governu mak kona-ba rekollamentu restus mortais, sei iha prosesu nia laran. Ba martires nain 6, hanesan hatudu dalan ba familia hotu no ami kontinua la’o hodi hasai martires sira nia ruin ne’ebe sei namkari hela liliu ba sira ne’ebe mate iha baze de apoiu husi Falintil no Sivil sira barak, mak seidauk hasai nia ruin,” nia hateten.
Ba martires sira laos deit ba postu venilale maibe ba mos postu seluk hanesan Quelikai, Baguia, Baucau no munisipiu Viqueque. Balun besik iha estesionamentu Uai-Oli, Venilale.
Komisariu Veteranus munisipiu Baucau hatene ona estesionamentu restus mortais ne’e. Maibe, seidauk husu ajuda. Ba futuru karik la iha forsa mak bele husu apoiu.
Ne’e hanesan prosesu rekollamentu restus mortais. Maibe sei buka maneira atu familia sira tur hamutuk, hodi ko’alia kona-ba martires sira ne’e atu lori ba nebe? Maibe familia martires sira husi suku Uai-Oli no Uatu-Haco, hakarak hakoi besik iha estasionamentu Uai-Oli, Venilale. Nune’e, bele vizita besik bainhira iha tempu loron importante ba matebian sira, duke ba Metinaro, Dili.
Orsamentu ne’ebe aloka ba estasioanmentu hamutuk osan dolar amerikanu rihun $13. Orsamentu nebe apoiu $ 500.00 maihusi Veteranus Santiago ho dolar amerikanu $250 no Komisaun Partidu Fretilin Postu Venilale $250. (*)
