Reportagem: Rosita Taec Tilo/Dulse de Fatima Lim
FATUBENA (lifaupress): Xefe suku Usi-taku, Postu Sub Rejiaun Nitibe, Hilario Duarte Babo Colo hateten, suku Usi-taku preparadu atu selebra loron proklamasaun independensia ba Dala 50 preparadu husi Formasaun organizadora
Xefe suku Usi-taku, Hilario Duarte Babu Colo ba jornalista online www. lifaupress.com iha Fatubena, Usitaku, Quinta feira(27 /11/2025)esplika, loron hirak ikus ne’e autoridade local, servisu hamutuk ho jestor eskola, relizioza, veteran no komunidade sira, halo preparasaun maximu, atu serimonia isar bendera ne’e la’o di’ak, tuir Governu nia planu.
Espesial ba isar bendera 28 Novembru 2025, involve estudante sira husi ESG, EBC, Haobenu no ESD Fatubena, “ Sira ajuda prepara atividade iha ha’u-nia suku, inklui prepara seremonia isarbandeira iha sede suku Usi-taku,” Xefe Suku esplika.
Atu partisipasaun husi populasaun sira maximu, Xefe Suku hamutuk ho Konsellu Suku, mobiliza komunidade komunidade husi Aldeia 4 atu partisipa serimonia isar bendera, Sesta-feira (28/11/2025) . Aldeia haat ne’e kompostu husi aldeia kuantua, Oamna, Nitibe no aldeia Fatunababu. Entretantu bairo Poasbot mak reprezenta suku Usi-taku partisipa seremonia nivel regional iha sidade Pante Makasar, Oe-cusse .
Kona-ba jogu komunitaria, nia informa, kompostu husi halai maratona, halai karon no tata berlindus. Nune’e jogu bola labele halo tanba atraza simu osan husi Governu, hamutuk osan $ $1.000.
Osan ne’e utiliza ba nesesidade importante sira relasiona ho serimonia isar bendera ne’e, hanesan tula komunidade Aldeia kuantua mai fatin serimonia, aluga soundsystem, konsumsi, hola bee ba paskibraka no koru sira.
Xefe suku agradese ba nai ulun sira, tanba tinan ida-ne’e selebra loron Proklamasaun Independensua iha suku. Signifika, komunidade sira bele sinti ona loron importante ne’e nia mensajen ba moris nudar nasaun soberano RDTL no bá oin sei bele kontinua nafatin, atu komunidade ne’ebe hela iha area rurais ne’e, sinti katak loron nasionál ne’e, loron boot duni .
“ Hau mos husu ba komunidade sira, atu loron boot hanesan ne’e tenke hasa’e bandeira iha uma oin, Labele hein autoridade fo hanoin ou ba obriga mak foin hasa’e bandeira iha uma oin,” nia dehan tan.
Atualmente suku Usi-taku nia luan:57,81 km² kuadradu, naruk:299,50km², total eskola (3) klinika (1) no postu saude (1) total Uma-kain 762. (*)
