Labele Fiar  Argumentu Falsu Husi Deputadu Sira

Reportagen:  Osterlia Muni

DILI-(Lifaupress): Retor Universidade da Paz, Adolmando Soares  Amaral kritika maka’as Deputadu Sira iha Parlamentu Nasional, ne’ebe defende hola kareta foun hodi fasilita fiskalizasaun iha teritoriu laran.

” Ha’u hanoin la urjensia  ba Parlamentu Nasional atu sosa kareta Prado foun. Tanba kareta nee  atu uza de’it ba tinan oin, hodi uza ba konsolidasaun politika.  Povu matenek ona, ne’ebe labele fiar ona argumentu  falsu husi Deputado sira,” Retor Universidade da Paz, Adolmando Soares  Amaral koalia Ida nee iha  Salaun Unpaz Manleuana, Dili, Tersa-feira ( 2/9/2025), relasiona ho Parlamentu Nasional hakarak hola kareta foun ba Deputadu Sira.

Adolmando dehan tan, mandatu ba Deputadu atual hela deit tinan 2. Tanba nee, tenki konsienti katak la merese atu hola kareta foun iha tempu agora.

“Durante nee, Sira iha kareta pajero la halo fiskalizasaun ho di’ak ba implementasaun projetu sira. Primeiru Ministru mak la’o haleu, tutur rai – rahun hodi fiskaliza projetu sira,” Adolmando dehan tan.

Kareta Pazero sport ne’ebe atual membru Parlamentu sira uza sei forsa hela,  tanba nia durasaun utilizasaun entre  tinan 5 to’o 10.

” Angguna deit halai iha foho, tula pasajeiru no sasan to  tinan 10 di’ak hela, tanbasa mak pazero sport foin tinan 5 kotuk atu truka paradu ona? Razoens ne’ebe reprezentante aprezenta la lojiku, “ nia dehan.

Kona-ba Prezidente Republika mos konkorda atu hola kareta foun, Adolmando dehan, Prezidenti Republika iha interese politika, atu kontnua hetan autorizasaun husi Parlamentu Nasional ba nia viajen ba estranjeiru. “Kada fulan, Prezidenti Republika sai hela deit. Sei nia la konkorda, Deputado sira la autoriza viagem ba rai liur,” nia reafirma.

Husi Parlamentu Nasional, kontinua defende atu hola kareta foun. ” Sira sira obriga sosa,  maka kamada intelektuais ho sosiedade sivil, sei organiza malu hodi kontra,” nia hateten.

Porta Voz, Eugenio dos Santos hateten, Parlamentu Nasional nu’udar órgaun soberanu ne’ebé reprezenta povu, hodi ezerse podér legislativu, fiskalizasaun ba programa governu tenki kria politika no foti desizaun  adekuadu no sustentavel hodi reprezenta interese povu.

Konaba raaun ne’ebe Parlamentu Nasional aprezenta katak presiza duni hola kareta prado foun 65, tanba kareta sira atual nia kustu manutensaun karun liu, Eugenio dos Santos hateten, “estudante no akadémika UNPAZ lamenta no diskorda totál.”.

Povu doben Timor Lorosa’e konsiente ona katak, hahu kedas husi primeiro Legislatura to’o ona sestu  Legislatura, forma ona Governu to’o dala sia, halo lei no desizaun politika oin-oin ba sira – nia interese privadu, partidu no grupu iha nakukun laran.

“ Povu la hola parte iha desizaun públiku husi deputadu sira. Ikus mai, órgaun Parlamentu Nasional ne’ebé povu tomak iha esperansa atu diskute no deside povu nia destinu ba moris di’ak, nakflilak ba fatin ne’ebé deputadu sira halo desizaun ba sira-nia interese privadu,  grupu no partidu, “ nia dehan. (*)