Reportangen: Osterlia Muni/Ana Maria da Silva
OECUSSE-(Lifaupress): Diretór Rejional Komersiu no Industria, Orlando Quelo hateten, atu selebra loron Aniversariu Proklamasaun Independensia ba dala 50 ne’ebe sei monu iha loron 28 Novembru 2025, Autoridade Rejiaun Administrativu Espesial Oe-cusse (RAEOA) sei realiza feira, hahu 22 Novembru 2025.
Diretór Rejional Komersiu no Industria, Orlando Quelo informa ida-ne’e durante entrevista ho jornalista midia online Lifau Press, Tersa-feira (18/11/2025) iha nia servisu fatin Palaban, Pante Makasar, Oe-cusse.
“ Kada tinna sempre realiza feira hodi promove produtu lokal dan maun de obra husi komunidade. Liuhusi feira, vizitante sira bele kuñese produtu sira ne’e maihusi suku ne’ebe iha iha Oe-cusse, no lori rendimentu ba komunidade sira ne’ebe partisipa feira ne’e,” Diretor Orlando Quelo dehan.
Partisipante feira ne’e maihusi grupu industria kreativu, hanesan grupu aterzenatu maihusi Grupo 20. “Tuir planu iha partisipante sira mau husi nasaun vizini sira mos partisipa. Maibe tenki hare situasaun no preparasaun ba fatin ho kondisaun di’ak, tanba agora tempu udan. Liuhusi feira ne’e, grupu sira promove produtu lokál ba publiku,” Diretor Orlando Quelo hateten.
Atualmente rejistu ba partisipante feira la’o hela no Governo prepara ona fatin iha tasi-ibun area Palaban, besik Kampu 1 de Maiu.
Ba partisipante feira sira, Komisaun hatur regra atur lori sasan produtu lokal ka Mao de obra no labele lori sasan uma laran ba tau hotu iha feira. “ Komunidade no vizitante sir abele hakbesik mai feira hodi hatene produtu local sira-ne’e maihusi suku ne’ebe no senti netik sabor husi produtu sira-ne’e.
” Se mak iha parseiru hodi fahe konesimentu ba produtu sira ne’ebe mak tama ona industrializasaun, bele mai feira hodi komunika malu, atu nune’e bele hatene prosesu ne’e,” nia dehan .
Nia mós apela ba komunidade hotu ne’ebe atu vizita feira ne’e, aproveita buat ruma iha feira ne’e, liuhusi kompras ka fahe esperensia ba malu kona-ba prosesu produz produtu lokál, industria produtu lokál no seluk tan. “ Mai vizita feira ne’e, la’os dehan katak ha’u la’o liu deit, maibe presiza hatene mos buat ruma,” nia dehan tan.
Liga orsamento ba eventu ne’e, nia dehan iha hela prosesu atu bele tulun komisaun organizadora halo preparasaun diakliu tan, liuliu palku no fasilidade sir aba partisipante feira no vizitante sira.
Tuir planu, abertura ba feira ne’e sei hala;o husi Prezidentu Autoridade RAEOA, Regio da Cruz Salu no no Koordenador ZEEDOA, Herculano da Sousa iha loron Sabadu, 22 Novembru 2025. (*)
