Polisia UPF Selebra Aniversariu Ba Dala 23

Date:

Share post:

Reportagen: Osterlia Muni

BATUGADE-(Lifaupress): Komandu Polisia Nasional Timor-leste selebra aniversariu Polisia Unidade Patrollamentu Especial Fronteira (UPF) ba Dala XXlll, iha Kuartel Polisia UPF Batugade, Bobanaro, Tersa-Feira,(30/09/2025) .

Marka  prezensa iha selebrasaun istoriku ne’e, Komandante Jerál  PNTL, Komisario Jerál Polisia, Henrique da Costa. Marka mos prezensa Komandante Unidade sira, membru polisia UPF no konvidadus sira seluk.

Komandante Jerál  PNTL, Komisario Jerál Polisia, Henrique da Costa iha nia diskursu hateten, selebrasaun Aniversariu UPF la’os selebrasaun loron anual de’it, maibe hanesan movimentu reflesaun apresiasaun no komprimisiu husi jornada naruk nakonu ho dezafiu.

“ Apresiasaun ba UPF hotu, hatudu ona. No realidade profisinalizmu ne’ebe estradinariu no komprimisiu katak  sei la para esforsu atu lori Forsa Instituisaun ne’e ba futuru ne’ebe seguru no hakmatek,” Komisariu Jerál Polisia, Henrique da Cost hateten.

“UPF nuudar Unidade importante iha estrutura PNTL.  Durante ne’e fo ona dedikasaun aas, hodi asegura seguransa hakmatek iha rai doben Timor –Leste,” nia dehan tan. Durante ne’e, Unidade patrollamentu Fronteira (UPF), la’os deit hala’o patrulla, maibe hanesan imajen PNTL iha komunidade nia leet.

“ Imi-nia pasu sira iha patrollamentu nuudar realidade, reprezenta nasaun. Patrullamentu ne’ebe imi halo, nudar mensajen ida, katak lei ne’e iha no povu la la’o mesak iha fronteira to’o suku sira,” Komisariu Jeral Polisia, Henrique da Costa reafirma.

UPF nafatin asegura tempu kalan no loron hodi tane povu.  No povu Timor- leste sei la nabilan, wainhira ema la sente seguru. No sentiment seguru sei la moris, bainhira  la liuhusi dedikasaun membru UPF hotu.

“Buat ne’ebe importante iha imi – nia misaun sira mak kontinua haforsa imi – nia koordenasaun ho liña ministeriais sira iha fronteira,  serbisu hamutuk mos ho komunidade hodi halo prevensaun ba krimi sira. Dedika imi – nia Aan hodi servi estadu no povu ida ne’e ho profisional,” nia dehan tan

Komisariu Jeral Polisia mos informa, tinan ida- ne’e Timor-leste hakerek tan istoria iha mundu, liuliu iha sudeste aziatiku, tanba sei adere ba organizasaun komunidade sudestika Azia, ASEAN.

“ Ne’e la’os de’it susesu politika estranjeiru no estratejia politika, maibe ne’e rekoñesimentu iha mundo ba iha mudansa, estabilidade no kumprimisu  ita-nia rai hodi asegura paz no kooperasaun iha rejional,” nia hateten.

Bainhira Timor-leste ofial nuudar membru pleno ASEAN, sei  lori oportunidade barak no dezafiu founhusi kooperasaun seguransa entre nasaun iha medida kombate krimi transnasional no asa’e kualidade Instituisaun Seguransa aplikasaun ba lei sira.

“ Ne’e maka ejiji estratejia PNTL, espesialmente UPF sai importante liutan,” Komandante Jerál  PNTL, Komisario Jerál Henrique Da Costa hatete ba jornalista sira, iha ambitu selebrasaun ne’e.

Nia esplika tan, iha kontestu ASEAN,  UPF la’os de’it asegura rai – laran maibé reprezenta preparasaun Timor-leste kontribui iha seguransa rejional, aplikasaun lei no profisional medida prevensaun konflitu sira ho umanizmu.

No mos atendimentu ba komunidade sira, hare direitu propriu ema nian.  Hirak ne’e nuudar estandar foun, ne’ebe presiza haforsa liutan buat ne’ebe konsagra ona iha programa prioridade lima no planu estratejia PNTL, ajuta mos iha programa Nuno Governo Konstitusional no planu estratejiku dezenvolvimentu Nasional.

“ Integrasaun ba ASEAN katak integrasaun iha sistema servisu rejional ne’ebe dinamiku, efisiente no kordenadu.  Ita sei la mesak.  Ita tenke prontu halo koordenasaun ho fujeiru sira ASEAN husi troka informasaun no operasaun konjunta sira,” nia esplika tan.

Komisariu Jeral PNTL ne’e mos husi Polisia hotu, liuliu UPF atu tau komemorasaun aniversariu ne’e iha fuan. Ne’e hanesan pontu ida hahu, iha era foun, la’o ba oin ho espiritu aas, moral forte no profisinalizmu metin liu ran.

UPF tenke hala’o beibeik treinamentu, hari’i interigradide, fo  preoridade ba atendimentu publiku no hametin relasaun ho komunidade. “ Ita lakoi komunidade sira tauk kuandu hare Polisia. Ita hakarak mak Polisia hetan respeitu husi komunidade sira. La’os servisu tanba ordem, maibe servisu ho responsabilidade, ne’ebe moris duni husi ita-nia fuan,” nia dehan.

Entretantu, Komandante Unidade Patrollamentu Fronteira, Superintende Xefi Polisia, Euclides Belo hateten, durante tinan 23, UPF eziste iha liña Fronteira ho knaar determinasaun, atu kumpri vizaun no misaun ho seguransa pas estabilidade  ba zona fronteira.

Maske infraestrutura iha fronteira sei menus, kumpri nafatin misaun totalmente ba estadu atu garante seguransa iha Fronteira. Tanba kapasidade UPF la mosu mai deit, maibé rezultadu husi Komando ne’ebe forte, orientsaun ne’ebe klaru no dixiplina iha ezekusaun.

“Ha’u hatete deit katak kna’ar la mai husi divide, maibe husi suporta instituisional, familia,  politikamente ne’ebe implenta iha terenu, atu hatudu rezultadu,” Superintende Xefi Polisia, Euclides Belo hateten.

Desde promeiru Governu to’o Nonu Governu Konstitusional, tau prioridade ba reabilitasaun konstrusaun melloramentu Posto UPF sira. Maske sei iha lakunas, maibé UPF kontinua serbisu.

“UPF kontinua kolabora ho parseiru serbisu nasaun vijinu sira, liuliu TNI. Ho akordo husi nasaun vijiñu, hamutuk ita bele hadia seguransa liña fronteira, kria paz no estabilisidade,”  nia dehan tan.

Nia  kompremete katak, UPF hala’o nafatin misaun tuir prinsipiu ne’ebe lei hakerek. UPF sei tane aas liu valor sira iha rezistensia. “Heroi sira – nia obra ne’ebe husik hela, ami sei garante. Ami-nia esperansa ba ita hotu fo apoiu atu bele sai knaar profisional ba serbisu sira iha liña fronteira,” nia reafirma tan . (*)

spot_img

Related articles

Kandidatu membru Polisia na’in 719 Partisipa  Ezame Kultural

Reportajen: Florentina Bianco da Cruz OE-CUSSE AMBENO – Kandidatu membru Polisia Nasional Timor-Leste (PNTL) foun na’in 719 iha...

HWPL Marks 11th Anniversary of September 18 World Peace Summit

CHEONGJU, Republic of Korea  (lifaupress) : – The international peace NGO Heavenly Culture, World Peace, Restoration of Light...

Dokumentu Kandidadu Ajenti Polisia 12.851 Admetidu

Reportagen: Osterlia Muni DILI- (Lifaupress): Hafoin halo selesaun Administrasaun, Komando Polisia Nasional Timor -leste ( PNTL) admiti kandidatu Ajente...

RAEOA  – SEkoop  Asina MOU Hametin  Koperativa

Reportagen:  Osterlia Muni/ Jerino F.B.P. Bere/ Maria O. Abi/ Joao A. Oqui OECUSSE- (lifaupress):  Prezidenti Autoridade Rejiaun Administrativu Espesial...