Reportazen :Osclarita D C Eco/Dulce da Conceicao Lim
OE-CUSSE (lifaupress) –Selebrasaun Missa ba finadu, 2 Novembru 2025 iha Paroquia Sao Miguel Arcanju Padiae, suku Lalisuk, Postu Administrativu Pante Makasar, Rejiaun Administrativu Espesial Oecusse Ambenu (RAEOA), Domingo (2/11/2025) prezidi husi Padre Arui Assamau no Padre Mariano Netho de Carvalho.
Iha omilia, evanjéliu ne’ebé padre Arui Assamau hato’o iha selebrasaun Loron Finadu/Matebian ne’e fó hanoin ba Sarani Katóliku atu prepara an di’akliu tan no hatene signifikadu moris no mate iha fé.
Padre Arui hateten, moris mortal mak hanorin ba ema atu prepara an ba Maromak. Nia lembra fali primeira leitura, ne’ebé dehan Maromak konvida ema hotu, ida-idak, atu tama ba han iha Maromak nia Meja, ne’ebé nakfilak, di’ak ho sabor boot ba ksolok espiritual.
Iha Selebrasaun nee, Sarani atu hadia hanoin ba inan-aman, avó-oan no maluk sira ne’ebé mate ona. Padre Arui fó ilustrasaun husi uma laran, katak, ema balun dehan aman mate uluk ne’e diak, balun dehan inan mak diak liu. Maibé iha realidade, moris no mate de’it mak sei eziste deit iha família no fó saudades boot ba sira ne’ebé hela.
Nia konta katak, saudades nee sai lalais bainhira ema hanoin momentu uluk— la’o hamutuk, buka merkadu, konta istória, haree avo sira hadomi oan sira. Balun lakon nia doben, balun lakon nia mantan. Mantan mak aimoruk ne’ebé ita buka, maibé ai-moruk loos mak Orasaun no Missa, tanba la iha aimoruk seluk atu kura saudades.
Padre Arui esplika mos katak, Igreja iha tinan dalan tolu: Igreja Peregrinu (ema moris), Igreja Penitente (purgatóriu) no Igreja Triunfante (ema Santu sira iha Lalehan). “ Matebian sira ne’ebé iha purgatóriu, presiza orasaun husi ita. Tanba dala barak ema haluha reza ba inan-aman sira iha loron seluk no orasaun mak “folin boot liu,” nia dehan .
Iha kultura Oe-Cusse, komunidade halo hahán ba matebian iha loron 1 no 2 Novembru. Padre Arui dehan, kultura ida – nee simboliku deit, tanba sinal ne’e hanorin ema hadia relasaun no hanoin ba sira ne’ebé lakon. Maibé nia fó enfatiza kona-ba buat ida, orasaun mak importante liu ba matebian, la’ós hahán ka lilin. “ Aifunan, lilin no hahán mak simbolu deit,” nia reafirma.
Padre harohan ba fiel sira, atu la haluha rezar bainhira ba rate, antes atu sunu lilin ka tau aifunan. Rezadu ba inan-aman sira mak ajuda liu tan, tanba moris mortal hanorin ema atu prepara an ba moris foun iha Kristu.
Nia remata ho mensajen katak, mate la’ós final maibe mate mak transformasaun. “ Jesus mak ai-han loloos ne’ebé mate no moris hias fali. Ita hotu sei hasoru mate, maibé bainhira ita moris hodi prepara an, ita hetan moris hias fali iha Maromak nia Lalehan. (*)
