Reportangen: Osterlia Muni/Jerino
OE-CUSSE(Lifaupress): Aniversariu Proklamasaun Independensia Republika Demokratika Timor-leste, besik ona. Autoridade sira, husi nasional to’o suku prepara dadaun atividade sira, hodi anima sidadaun no haburas espiritu nasionalizmu.
Nune’e mos iha Rejiaun Administrativu Espesial Oe-cusse Ambeno (RAEOA). Kuarta – feira (5/11/2026) ne’e iha salaun administrasi municipal Numbei, Pante Makasar autoridade RAEOA halo konvokatoriu enkontru ida, hodi halo koordenasaun kona-ba preparasaun selebrasaun loron importante ne’e.
Enkontru ne’e, kidera husi Diretor Rejiona Administrasaun, Jose Tanesib Anuno, partisipa mos husi Diretor Jeral RAEOA, Diretor Rejonal sira, reprezentante F-FDTL, PNTL, Administrador Sub Rejiaun, Xefe Suku, membru komisaun organizadora no media sira.
Hafoin enkontru, Diretor Regional Da Adminitrsaun (DRA) Jose ‘Tanesib’ Anuno ba jornalista sira, esplika, atualmente estabelese tiha ona Komisaun Organizadora hodi hala’o atividade sira ne’ebe define ona, inklui serimonia Isar Bendera Nasional, 28 Novembru 2025.
Espesial ba serimonia isar bendera, Jose Anuno esplika, tinan ne’e sei realiza iha suku 20 iha teritoriu RAEOA. “ Ita halo diferenti ho serimonia Isar Bendera tinan sira liuba. Ita hakarak halo serimonia isar bendera iha suku hotu. Nune’e, komunidade senti loron boot ba proklamasaun independensia ne’e. No iha tempu hanesan, ita hametin espiritu nasionalizmu sidadaun sira,” nia dehan tan.
Nune’e, Diretor Regional Administrasaun ne’e orienta Administrador Sub Rejiaun sira, koordena ho autoridade suku sira, hodi realiza atividade ne’e ho susesu.
Kona-ba peparasaun ba serimonia aniversariu Loron Proklamasaun Independensia ne’ebe parte uitoan, nia dehan, “ Ha’u hanoin ami tarde ona, maibé ita hahu ona hodi prepara ona ho prosesu ba programa ida – nee. Tanba eventu nee eventu Nasionál, ne’ene tuir planu sei marka mós prezensa Primeiru Ministru, Kay Raka Xanana Gusmao, ita halo preparasaun di’ak atu la’o susesu,” nia dehan.
Iha parte seluk nia dehan tan, komunidade sira bele hahu hasa’e ona bandeira iha idak- idak nia uma oin. Nue’e, ita sentu ambiente selebrasaun loron importunate ne’e. Ita mos prepara ba programa desentralizasaun no poder lokál,” nia afirma. (*)
