DILI (lifaupress) : Jonalista senior, Carlos Malialaka hakotu ona iis iha Ospital Nasional Guido Valadares hafoin hala’o tratamentu intensive durante kuaze fulan 6 tanba sofre moras respiratoriu. Matebian husik hela nia kaben ho oan na’in tolu – mane rua, feto ida.
Tuir informasaun ne’ebe online www.lifaupress.com, Kuarta (5/11/2025) ne’e, familia mate-bian durante hirak ne’e, luta atu salva nia vida, liuhusi tratamentu iha Ospital Nasional Guido Valadares. Mediku sira mos esforsu atu bele rekopera, maibe Maromak nia hakarak mak bootliu hotu.
Nia sofre moras respiratoriu no komplikadu ho TBC. Mate-bian ho familia esforsu maka’as atu bele rekopera, maibe ikusliu labele salva. “ Ami mai ona iha mortuariu, no hamutuk ho familia hein hela prosesu atu lori ba uma,” fonts ne’e informa.
Durante ne’e, matebian kaer pozisaun nuudar Xefe Redasaun Grupu Media Nasional GMN iha Dili. Nia hahu kareira jornalista iha Diariu Timor Post nuudar jornalista korespodenti iha tinan 2000 la leten. Tanba hatudu performa servisu di’ak, muda tiha nia mai Dili, hodi destaka ba kobertura iha area oioin.
Tanba hakarak eleva abilidade lian Tetun, matebian ativu tuir kursu dalen Tetun no ikus mai servisu nuudar revizor testu tetun iha Timor Aid. Hafoin tinan rua liuba hetan fiar nudar Xefe redasaun GMN Media.
Otelio Ote, nuudar Mestri jornalista ba matebian, senti lakon tebes figura jornalista ida ne’ebe ativu, dixiplina, kretaivu no sempre buka eleva nia profesionalizmu. “ Truste tebes. Maun Carlos make ma ne’ebe ha’u fiar atu tulun jornalista jerasaun foun sira, metin iha kareira no profisional iha servisu. Maibe, Maromak bolu hikas fali ona,” Otelio dehan.
Maun Carlos bele la iha ona, maibe nia naran no espiritu jornalizmu nafatin kuda metin iha komunidade media nia leet. “ Ita hotu hato’o sentidu kondelensia ba familia em lutada no hamutuk reza atu nia hetan moris rohan laek iha Maromak Nia sorin Kuana,” eis Prezidenti Konsellu Imprensa ne’e hateten. (*)
