Reportagen: Osterlia Muni
DILI (Lifaupress): Parlamentu Nasionál la’os ona reprezenta povu, maibé reprezenta sira – nia interese individu, família, grupu no partidu. Grave liu mak reprezenta oligarkia iha rai lulik ne’ebe sosa ho ruin no ran.
Porta Voz estudante no Senadu UNPAZ, Eugenio dos Santos dehan ba jornalista sira iha Salaun UNPAZ Dili, Tersa-feira (02/09/2025) relasiona ho ejijebsia parlamentu nasional atu hola kareta Prado foun 65 ba deputadu sira.
“Povu doben Timor-Lorosa’e, ohin – loron ita hotu haree katak deputadu sira la ezerse sira – nia podér no funsaun polítika ho di’ak, hodi diskute problema sosiál neʼebé estruturál tebes iha paíz ida ne’e. La debate mos kona – ba setór produtivu ka estratejiku sira hanesan setór edukasaun, setór agrikultura, setór turizmu, setör saúde, infraestrutura báziku no setor seluk ne’ebé bele fo satisfasaun ba povu nia moris sustentavel iha futuru,” Eugenio dos Santos hateten.
Porta voz ne’e mos dehan, Parlamentu Nasional, ohin – loron sai de’it fatin konflitu entre deputadu, istoria malu, trata malu, dun malu, no konta istória se mak luta no se mak la luta, se mak halo di’ak no se mak halo la diak.
Atidude membru Parlamentu Nasional sira iha Plenaria Parlamentar durante ne’e, hatun imagen no kredibilidade órgaun soberanu estadu. “Deputadu sira la iha ona resposabilidade morál hodi servi povu no diskuti povu nia interese,” nia dehan tan.
Nune’e, husu ba Prezidente Da Republica Jose Ramos Horta no Primeiro Ministru, Kayrala Xanana Gusmão tau atensaun ba desizaun Parlamentu Nasional. Husu mos ba membru Governu sira, atu utiliza patrimoniu estadu tuir lei, hodi servi de’it povu no nasaun doben ida ne’e.
“Ami mos husu ba sidadaun hotu, estudante akademiku husi universiade no institutu hotu, veteranus sira, juventude rezistensia, sosiedade sivil, atu nafatin resiste kontra desizaun polítika ne’ebé la afavor ba povu – nia moris diak,” Porta Voz Senadu UNPAZ reafirma. (*)
